Лукашэнка памірае — каму дастанецца ўлада? Тлумачым, як павінна быць па законе

Адказу на яго ні ў кога няма, але ў заканадаўстве прапісаны дакладны парадак "перадачы стальца". Расказваем, як усё павінна быць хаця б паводле закона.

Дык хто ж бярэ ўладу

Калі ўявіць, што Беларусь — прававая дзяржава (памарым), то ўсе асноўныя працэдуры, звязаныя з уладкаваннем улады і краіны, прапісаныя ў Канстытуцыі.

У дзейнай рэдакцыі Канстытуцыі (той, якую памянялі пасля рэферэндуму 2022 года) на пытанне "што будзе, калі Лукашэнка памрэ" адказвае 88-ы артыкул:

"У выпадку вакансіі пасады прэзідэнта або немагчымасці выканання ім сваіх абавязкаў на падставах, прадугледжаных Канстытуцыяй, яго паўнамоцтвы да прынясення прысягі зноў абраным прэзідэнтам пераходзяць да старшыні Савета Рэспублікі", — напісана ў асноўным законе.

Калі першай асобы не стане праз замах на жыццё, то ўсё зробіцца крыху складанейшым: асноўныя рашэнні прымае Савет Бяспекі, на якім старшынюе ўсё той жа спікер Савета Рэспублікі.

Цікава: у папярэдняй рэдакцыі Канстытуцыі паўнамоцтвы прэзідэнта пераходзілі да прэм'ер-міністра.

І прыз сыходзіць... да водаправодчыкаў

А хто ў нас цяпер старшыня Савета Рэспублікі? Наталля Качанава, паводле адукацыі — інжынер, якая пачынала працу на "водаканале" ў Полацку, а пасля займала пасады віцэ-прэм'ера і кіраўніцы Адміністрацыі Лукашэнкі.

У такой сітуацыі пасада прэзідэнта лічыцца вакантнай. І артыкул 81 Канстытуцыі кажа вось што:

"Калі пасада прэзідэнта аказалася вакантнай, выбары праводзяцца не раней чым праз 30 дзён і не пазней чым праз 70 дзён з дня адкрыцця вакансіі".

Гэта значыць, у тэорыі цягам двух месяцаў павінны будуць прайсці новыя выбары. Прызначыць іх павінна будзе Палата прадстаўнікоў, правесці — Цэнтрвыбаркам.

Але ўсё гэта, зноў паўторым, выключна як павінна быць у тэорыі паводле Канстытуцыі.