Пад санкцыі ЕС трапіла прадпрыемства РБ, чыю прадукцыю выявілі на полі бою

У 16-ы пакет санкцый Еўрасаюза супраць Расіі, прыняты 24 лютага, увайшло беларускае дзяржаўнае прадпрыемства "Інтэграл", якое дзесяць дзён таму наведваў Аляксандр Лукашэнка.

У рашэнні ЕС адзначаецца, што прадукцыю "Інтэграла" закупляюць "расійскія арганізацыі, якія ўдзельнічаюць у расійскай агрэсіі супраць Украіны, а яго прадукцыя была выяўленая на полі бою". Асобна падкрэсліваецца, што большую частку экспарту "Інтэграла" складаюць акурат расійскія заказы.

У дакуменце гаворыца, што Расія інвеставала ў "Інтэграл" 350 мільёнаў долараў, бо паўправаднікі жыццёва важныя для ваенных дзеянняў, якія РФ вядзе ва Украіне.  

"Таму ААТ "Інтэграл" падтрымлівае дзеянні, якія падрываюць і пагражаюць тэрытарыяльнай цэласнасці, суверэнітэту і незалежнасці Украіны, а таксама падтрымлівае і атрымлівае выгаду з урада Расеійскай Федэрацыі, які нясе адказнасць за анэксію Крыма і дэстабілізацыю Украіны", — канстатуюць у ЕС.

Як расказвала Еўрарадыё, у студзені выйшла расследаванне Беларускага расследвальніцкага цэнтра пра тое, як расійская вайсковая прамысловасць выкарыстоўвае прадукцыю "Інтэграла".