Знікненнем Анжалікі Мельнікавай глыбока ўстрывожаны старшыня ПАСЕ

Старшыня ПАСЕ Тэадорас Русопулас заявіў, што глубока ўстрывожаны знікненнем спікеркі Каардынацыйнай рады Анжалікі Мельнікавай і дзвюх яе дачок.

"Рэжым Лукашэнкі мае доўгую гісторыю ўжывання рэпрэсій і запалохвання супраць сваіх апанентаў, што робіць кожнае такое знікненне прадметам сур'ёзнай заклапочанасці. Анжаліка Мельнікава была мужным абаронцам свабоднай і дэмакратычнай Беларусі. У студзені 2025 года, у складзе гістарычнай першай прадстаўнічай дэлегацыі дэмакратычных сіл Беларусі ў Асамблеі, яна выступіла і адкрыта распавяла пра жорсткасць рэжыму і рэпрэсіі", — заявіў ён.

Русопулас заклікаў усіх, у каго ёсць інфармацыя пра месцазнаходжанне Анжалікі Мельнікавай і яе дачок, неадкладна звязацца з польскімі спецслужбамі.

Тым часам у Каардынацыйнай радзе стварылі працоўную групу, якая будзе высвятляць абставіны знікнення спікера. Яе стварэнне ініцыявалі фракцыі "Наша справа" і Блок Пракоп‘ева і Ягорава. Першае пасяджэнне групы прайшло 30 сакавіка.

Публічныя звесткі пра знікненне Анжалікі Мельнікавай з'явіліся ў пятніцу, 28 сакавіка. Кіраўнік НАУ Павел Латушка паведаміў, што сувязі з ёй няма з 25 сакавіка. У МУС Польшчы заявілі, што Мельнікава пакінула краіну некалькі тыдняў таму.