Іранцы ўзвядуць у Мінску пяцізоркавы гатэль
Сёння прайшла цырымонія афіцыйнага пачатку яго будаўніцтва на вуліцы Няміга ля бізнес-цэнтра "Няміга-Сіці".
На цырымоніі прысутнічалі амбасадар Ірана ў Беларусі Сэед Абдала Хасэйні, прадстаўнікі Мінгарвыканкама. Заказчык аб'екта — іранская кампанія "Перс Паліс Інвест".
Як распавёў агенцтву "Мінск-Навіны" гендырэктар кампаніі Хасэйн Хатэфі, у гатэлі будзе 35 паверхаў, а таксама трохузроўневая падземная паркоўка. На даху запланаваная верталётная пляцоўка. Акрамя 259 нумароў, у будынку размесцяцца аздараўленчы комплекс, басейн, персідская лазня, спартовыя залы, забаўляльны і гандлёвы цэнтры, рэстараны. Дзесяць паверхаў прызначаныя для VIP-гасцей. Пабудаваць гатэль плануецца да 2014 года. Аб'ём інвестыцый складзе каля 150 млн долараў.
