Розніца бывае вялікай: колькі каштуюць адны і тыя ж лекі ў Беларусі і Польшчы

Мультывітамінны комплекс ат кампаніі Doppelherz (40 таблетак) вы зможаце набыць у Польшчы за 23,19 злотага (19,1 рубля), у беларускіх аптэках прэпарат у сярэднім можна набыць за кошт ад 20 да 24 рублёў.

За 30 таблетак мультывітаміннага комплексу Supradyn у Польшчы вы б заплацілі 60,29 злотага (49 рублёў), у Беларусі прэпарат набываць шмат больш выгадна — тут ён у сярэднім каштуе 33,29 рубля.

Далей на чарзе — назальныя кроплі Otrivin аб'ёмам 10 мл. У польскіх аптэках прэпарат каштуе 19,69 злотага (16,2 рубля), у беларускіх больш выгадна — 10,36 рубля. Розніца — амаль 6 рублёў.

Супрацьпрастудны “Гропрынасін” ад “Гедэон Рыхтэр” крыху, але ўсё ж такі таннейшы ў Польшчы: 50 таблетак па 500 мг тут каштуюць 40,69 злотага (33,5 рубля), а ў Беларусі 43 рублі.

Прэпарат для паляпшэння стрававання “Мезім” таксама нявыгадна набываць у Польшчы, тут за 20 таблетак вы б заплацілі 24,39 злотага (20,1 рубля), у беларускіх аптэках такі ж прэпарат будзе каштаваць на 10,6 рубля танней — 9,50.

Вядомыя таблеткі для лячэння прастаты “Прастамол Уна” (32 мг, 60 штук) у польскіх аптэках каштуе 66,19 злотага (54 рублі), у Беларусі гэты лек у сярэднім каштуе каля 48 рублёў.

Супрацьзапаленчы сродак для лячэння хваробы Крона “Салафальк” (500 мг, 50 штук), які не так даўно знікаў з паліц беларускіх аптэк, у Польшчы каштуе каля 52 злотых (42,8 рубля), у Беларусі амаль столькі ж — 41 рубель.

“Метыпрэд” (16 мг, 30 штук) — лек для зніжэння запалення і сімптомаў алергіі — ацэньваецца ў Польшчы ў 33,22 злотага (27,4 рубля), у Беларусі крыху даражэй — 32,09 рубля.
 

50% усіх лекаў у Беларусі — імпарт

Хоць санкцыі наўпрост і не тычацца паставак у Беларусь медыкаментаў, некаторыя еўрапейскія кампаніі не вельмі і хочуць працаваць з беларускімі ўладамі.

Як пісала DW, рэжым скардзіўся, што брытанскія, польскія, фінскія, шведскія кампаніі адмовіліся пастаўляць у Беларусь шэраг прэпаратаў, сярод якіх лекі ад эпілепсіі і хваробы Паркінсона.

Тым не менш каля 50% беларускага рынку лекаў застаецца імпартным. Улады чакаюць, што да 2025 года доля айчынных лекаў узрасце да 70%.

Што ў выніку?

Калі вы хочаце сапраўды эканоміць на якасных леках, прыйдзецца вельмі добра вывучыць цэны, як у Польшчы, так і ў Беларусі. Нешта за мяжой будзе танней, нешта даражэй.

Але ўлічваючы, што сярэдні заробак у Польшчы да выліку падаткаў складае 8140 злотых (6754,8 рубля), а ў Беларусі — 2313,9 рубля, нескладана сказаць, у якой краіне медыцынскія прэпараты больш даступныя.