СК завяршыў расследаванне справы пра "крывавы салют" 3 ліпеня 2019-га

04/03/2020 - 06:02

Галоўнае следчае ўпраўленне Следчага камітэта завяршыла расследаванне крымінальнай справы пра выбухі салютных установак у Мінску 3 ліпеня 2019 года.

Як паведамляе прэс-служба СК,па звестках следства, перад салютам супрацоўнікі Мінскай ваеннай камендатуры выявілі, што большая частка зарадаў калібра 195 мм, прызначаных для салюту, не адпавядае нарматыўна-тэхнічнай дакументацыі. Следства заяўляе, што ў піратэхніцы быў брак, дапушчаны на расійскім прадпрыемстве-вытворцы. Калібр снарадаў перавышаў норму, што не дазваляла зарадзіць іх у ствалы салютных установак. "Яны падлягалі безумоўнай адбракоўцы і не маглі бяспечна выкарыстоўвацца пры правядзенні салюту", — адзначае прэс-служба СК.

Камендатура выклікала ў Мінск двух расійскіх інжынераў прадпрыемства-вытворцы, каб выправіць на месцы выяўленыя дэфекты і замяніць бракаваныя вырабы.

Паведамляецца, што гэтыя інжынеры разам з камандзірам роты Мінскай камендатуры змяншалі калібр зарадаў "шляхам механічнага ўздзеяння", што не прадугледжана нарматыўнай і тэхнічнай дакументацыяй. Гэтая апрацоўка зарадаў прывяла іх у небяспечны стан, "што пацвярджаецца вынікамі экспертных даследаванняў і следчага эксперыменту". (Паведамлялася, што салдаты цёрлі гэтыя зарады аб асфальт і абразалі, каб зменшыць іх дыяметр.)

У восем салютных установак было зараджана 480 феерверачных зарадаў. Прычым больш за 190 з іх прайшлі згаданую вышэй "механічную апрацоўку".

Падчас салюту зарады выбухнулі на нізкай вышыні і ў ствалах марцір. Пры гэтым адзін чалавек загінуў, яшчэ адзінаццаць пацярпелі. Матэрыяльная шкода, прычыненая асколкамі зарадаў, ацэньваецца на агульную суму больш за 740 тысяч рублёў.

Двум расійскім інжынерам выстаўленае абвінавачанне ў парушэнні правілаў абыходжання з піратэхнічнымі вырабамі, што пацягнула па неасцярожнасці смерць чалавека і прычыненне шкоды ў буйным памеры. Камандзіра роты Мінскай ваеннай камендатуры вінавацяць у парушэнні правілаў абыходжання з прадметамі, якія ўяўляюць павышаную небяспеку для навакольных, што пацягнула па неасцярожнасці смерць чалавека і прычыненне шкоды ў асабліва буйным памеры.

Матэрыялы крымінальнай справы перададзеныя пракурору для накіравання ў суд.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.