Топ-5: навіны 30 студзеня
Бізнесмену Аляксандру Кныровічу працягнулі тэрмін знаходжання пад вартай
Бізнесмену Аляксандру Кныровічу на дзесяць дзён працягнулі тэрмін знаходжання пад вартай. 72 гадзіны, на якія мужчыну затрымалі першапачаткова, скончыліся яшчэ ў суботу ўначы. Пра гэта Еўрарадыё распавёў бацька прадпрымальніка Станіслаў Кныровіч.
Мужчына кантактуе з сынам праз адваката. Па яго словах, ужо адбыўся першы допыт Аляксандра Кныровіча ў якасці падазраванага. Але афіцыйныя абвінавачанні бізнесмену яшчэ не выставілі.
Запазычанасць Беларусі за расійскі газ дасягнула 550 млн долараў. Такую лічбу назваў журналістам віцэ-прэм'ер Расіі Аркадзь Дварковіч.
Пры гэтым Беларусь і Расія па-ранейшаму не могуць вырашыць спрэчку па пастаўках газу. Яна цягнецца з пачатку 2016 года. Расія настойвае на тым, што аплата павінна весціся ў адпаведнасці з кантрактам, а гэта 132 долары за тысячу кубоў газу. У сваю чаргу Беларусь лічыць, што плаціць трэба па справядлівым кошце, а гэта, на думку Мінска, амаль у 2 разы менш, чым хочуць расіяне.
30 студзеня каля Міністэрства эканомікі адбыўся пікет індывідуальных прадпрымальнікаў. На яго сабралося каля двух дзясяткай чалавек, у тым ліку старшыня аб’ядання "Перспектыва" Анатоль Шумчанка, а таксама ІП з Мінска і рэгіёнаў.
Справа ў тым, што ў гэты дзень у Міністэрстве эканомікі прайшло пасяджэнне працоўнай групы па пытаннях дзейнасці ІП.
Шумчанка падрыхтаваў да гэтай сустрэчы зварот да ўладаў. Ён патрабаваў зацвердзіць праект указа, распрацаваны "Перспектывай". У звароце сцвярджалася, што ўмовы працы ІП у Беларусі пастаянна пагаршаюцца, а гэта можа прывесці да масавых акцыяў пратэсту па ўсёй краіне.
У Мінску пахавалі Аляксандра Ціхановіча. Народны артыст Беларусі памёр пасля цяжкай хваробы на 65-м годзе жыцця. Развітацца з ім прыйшлі тысячы людзей. Сярод іх былі чыноўнікі і дзяржаўныя дзеячы, а таксама паплечнікі ды калегі музыкі.
Суд Мінска аштрафаваў апазіцыйнага актывіста Змітра Дашкевіча на 1150 рублёў (гэта амаль 600 долараў). Лідара "Маладога фронту"(арганізацыя зарэгістраваная ў Чэхіі) прызналі вінаватым у непадпарадкаванні супрацоўніку міліцыі.
Па словах Дашкевіча, яго затрымалі 31 снежня ў 23.30 каля дома. У навагоднюю ноч ён з паплечнікамі планаваў правесці акцыю ў цэнтры Мінску — сустрэць свята з нацыянальнымі бел-чырвона-белымі сцягамі.
У судзе, які прайшоў без Дашкевіча, супраць яго сведчылі два міліцыянты. Яны заявілі, што актывіст адмаўляўся прайсці для разбіральніцтва ў аддзяленне, а таксама "ўпіраўся нагамі ды сядаў на зямлю".
