Турысты з'елі ўвесь японскі рыс, а Сакрэтная служба ЗША фрустраваная — #ІхНоравы

Ханія быў ключавой фігурай у перамовах паміж ХАМАС і Ізраілем, і цяпер ёсць сумневы ў тым, што спыненне агню ў Газе магчымае ў найбліжэйшай перспектыве. Вярхоўны лідар Ірана, аятала Алі Хаменеі, ужо заявіў, што адпомсціць за ягоную смерць — "абавязак Тэгерана". Ён дадаў, што Ізраіль даў падставы для "суровага пакарання".

Ізраіль не браў на сябе адказнасць за забойства Ханіі, і многія цяпер задаюцца пытаннем: а навошта гэта наогул магло спатрэбіцца Ізраілю?

— Калі гэта была, як усе мяркуюць, ізраільская аперацыя, навошта яна была праведзеная? Чаго спадзяваўся дабіцца Ізраіль, акрамя жадання адпомсціць усім, хто звязаны з ХАМАС? — піша дыпламатычны карэспандэнт ВВС Пол Адамс. — Міністэрства замежных спраў Турцыі ўжо абагульніла імаверную рэакцыю многіх у рэгіёне, абвінаваціўшы Біньяміна Нетаньяху ў "адсутнасці намеру дасягнуць міру".

Кепскі дзень у Microsoft

У Microsoft ліквідавалі новы збой, а папярэдняе расследаванне паказала, што ён быў выкліканы кібератакай — і няздольнасцю абараніцца ад яе. Гэтым разам леглі нават паштовы сэрвіс Outlook і відэагульня Minecraft.

"Памылка ў рэалізацыі нашых ахоўных мер узмацніла ўздзеянне атакі, а не змякчыла яго", — кажуць у кампаніі.

Усяго два тыдні прайшло з папярэдняга збою, калі ад некарэктнага абнаўлення праграмнага забяспечання 8,5 млн камп'ютараў на базе сістэм Microsoft сталі недаступнымі. Гэта паўплывала наогул на ўвесь свет, закранула і ахову здароўя, і аэрапорты.

"Здаецца трохі сюррэалістычным, што мы сутыкнуліся з чарговым сур'ёзным збоем у працы анлайн-сэрвісаў Microsoft, — заявіў эксперт па камп'ютарнай бяспецы, прафесар Алан Вудвард. — Можна было б чакаць, што сеткавая інфраструктура Microsoft будзе абароненая ад бомбаў".

Трохі адказаў на пытанні пра стрэлы ў Трампа

Але, скажам наўпрост, у Сакрэтнай службы ЗША яшчэ горшыя дні. На шматлікіх слуханнях у Сенаце яе новы кіраўнік Рональд Роу ўсё спрабуе растлумачыць, як стралок трапіў на дах American Glass Research — будынка, з якога зрабіў некалькі стрэлаў на перадвыбарным мітынгу Дональда Трампа.

Апошнія навіны: у Сакрэтнай службы ўсё яшчэ няма выразнай версіі падзей. Мяркуюць, што малады чалавек пранёс вінтоўку на дах у разабраным выглядзе — і сабраў яе ўжо там. Інакш ствол, што тырчыць з торбы, дакладна заўважылі б.

Таксама раскрылася, што праз праблемы з сотавай сувяззю ў месцы правядзення мітынгу Сакрэтная служба не змагла разгарнуць сістэму процідзеяння дронам. Інакш яшчэ да пачатку мітынгу заўважыла б беспілотнік, з дапамогай якога стралок, відаць, вёў разведку.