У Чачэрску пачалася рэканструкцыя ратушы XVIII стагоддзя

Рэканструкцыю ратушы XVIII стагоддзя пачалі ў Чачэрску, перадае тэлерадыёкампанія "Гомель".

Ратуша была пабудаваная ў XVIII стагоддзі на загад графа Захара Чарнышова — аднаго з фаварытаў расійскай імператрыцы Кацярыны ІІ. У яе архітэктуры выкарыстаныя элементы неаготыкі і класічнага дойлідства. Першы і другі паверхі будынка каменныя, а вышэй ідуць драўляныя канструкцыі.

Папярэдні раз аднаўленнем ратушы займаліся 30 гадоў таму — пасля пажару, які адбыўся ў 1974 годзе.

Потым 25 гадоў мясцовыя ўлады праводзілі рамонтныя работы без прыцягнення спецыялістаў. Таму цяпер "Гомельрэстаўрацыя" будзе, верагодна, займацца і рэканструкцыяй, і рэстаўрацыяй будынка. Мяркуецца, што на работы спатрэбіцца дзевяць месяцаў.

Па словах дырэктаркі Чачэрскага гісторыка-этнаграфічнага музея Таццяны Ганчаровай, ёсць звесткі, што ад падвальных памяшканняў ратушы ішлі тры падземныя хады. Нібыта ў 1990-х іх замуравалі дзеля бяспекі.