Удалося вылічыць супрацоўнікаў КДБ, адказных за стварэнне спісу "тэрарыстаў"

Удалося вылічыць супрацоўнікаў КДБ Беларусі, адказных за стварэнне спісу "тэрарыстаў" (у яго ўносяць і палітвязняў, і палітуцекачоў). У метазвестках файла, які апублікаваў тг-канал дзяржбяспекі, згадваюцца Аляксей Праватораў і Аляксандр Антановіч, піша "Наша ніва".

Чалавек, які стварыў спіс "тэрарыстаў", пазначаны як Аляксей Праватораў. Па даных праекта Digital intelligence team, яму 40 гадоў. Праватораў нарадзіўся ў Мінску, жыве ў вёсцы Копішча ў Мінскім раёне. Да КДБ ён доўгі час працаваў у галіне адукацыі (у тым ліку ў Мінскім дзяржаўным лінгвістычным універсітэце). З 2012-га — ва Упраўленні КДБ па Мінску і Мінскай вобласці.

Аляксандр Антановіч — чалавек, які пазначаны як аўтар апошняга змянення спісу "тэрарыстаў". Па даных Digital intelligence team, яму 51 год. Гэта ўраджэнец Мінска, які доўгі час жыў ва Украіне. Беларускае грамадзянства атрымаў у 1997-м. Мае службовы і дыпламатычны пашпарты. Антановіч служыў у элітным падраздзяленні КДБ, ва ўпраўленні ваеннай контрразведкі КДБ. Не пазней за 2016 год перайшоў на працу ў цэнтральны апарат дзяржбяспекі. Аляксандр Антановіч па дыпламатычным пашпарце наведваў Германію, Францыю, Украіну, Польшчу, Аўстрыю, Літву, Латвію. У 2010-2011 гадах ездзіў па службовых справах у Ліван.

Гэта не першы пракол КДБ РБ. "Кібер-партызаны" ўзламалі сайт дзяржбяспекі і вясной 2024-га злілі ў сетку каля 40 тысяч зваротаў, напісаных на адрас ведамства з 2014 па 2023 год.