19:58 Беларусь і Латвія спрасцяць парадак перасячэння мяжы

Беларусь і Латвія плануюць завяршыць да канца 2007 года працу над праектам Дамовы аб спрошчаным парадку перасячэння мяжы Латвіі і Беларусі жыхарамі прыгранічных тэрыторый. Пра гэта паведамілі ў прэс-службе міністэрства замежных спраў краіны. 15-16 сакавіка ў Мінску адбыліся чарговыя беларуска-латвійскія кансультацыі на ўзроўні кіраўнікоў консульскіх служб знешнепалітычных ведамстваў дзвюх краін.

Удзельнікі сустрэчы дамовіліся прадугледзець у дадзенай дамове магчымасць выдачы прыгранічнаму насельніцтву льготных шматразовых віз з тэрмінам дзеяння да 2 гадоў.

Акрамя гэтага, дасягнута дамоўленасць аб узаемным скарачэнні тэрмінаў разгляду візавых запытаў. Бакі вырашылі, што неабходна спрасціць працэдуру рашэння і шэрагу іншых пытанняў.

У прыватнасці гэта датычыцца вызвалення ад неабходнасці афармлення выязных віз для грамадзян, якія маюць від на жыхарства або пасведчанні замест згубленага пашпарта, а таксама павелічэнні з 90 да 180 дзён у год дазволенага тэрміна знаходжання на тэрыторыі дзвюх дзяржаў.


Паведамляе “Інтэрфакс”