Беларусь не пералічвае антыдопінгавы ўнёсак у WADA, спасылаючыся на санкцыі
Сусветнае антыдопінгавае агенцтва WADA, ілюстрацыйнае фота / Reuters
Беларусь не пералічвае штогадовы ўнёсак у Сусветнае антыдопінгавае агенцтва (WADA), бо гэтаму перашкаджаюць санкцыі, накладзеныя на беларускія банкі. Пра гэта на міжнародным антыдопінгавым форуме "Чысты спорт без межаў" заявіў міністр спорту і турызму Сяргей Кавальчук.
"Прысутнічаюць санкцыі ў банкаўскай сферы, якія не дазваляюць праводзіць плацяжы унёскаў у Сусветнае антыдопінгавае агенцтва", — цытуе ТАСС яго словы.
Намеснік міністра Аляксандр Баравуля таксама заявіў пра тэхнічныя цяжкасці: "Як пераводзіць, калі ёсць санкцыі да банкаў?"
Паводле інфармацыі Сусветнага антыдопінгавага агенцтва, летась Беларусь мусіла выплаціць WADA 46 032 долары, сёлета — 49 340 долараў.
