"Да вас не прыходзілі — яшчэ прыйдуць". Навошта міліцыя ходзіць да "палітычных"

Падобная гісторыя адбылася і з Міхаілам. У 2021 годзе яго судзілі за распаўсюд "экстрэмісцкіх матэрыялаў", амаль адразу звольнілі з працы, і праз пару месяцаў мужчына выехаў у Польшчу.

— За два з паловай гады, што я ў Польшчы, міліцыя да мяне прыходзіла двойчы: спачатку ўчастковы мяне шукаў недзе год таму, а апошні раз быў зусім нядаўна. Патэлефанавалі маёй маці і спыталі, дзе я (мабыць, не змаглі датэлефанавацца да мяне самога, таму што мой нумар у Беларусі ўжо не працуе), яна адказала, што не ведае.

На наступны дзень, кажа мужчына, яны прыйшлі ўжо да яго дадому.

— Мама расказала, што яны хацелі, каб я падпісаў паперы аб тым, што абавяжуся не хадзіць на акцыі пратэсту і што "разумею ўсю адказнасць". У кватэру яны не заходзілі, але затое расказалі, нашто прыйшлі. Не ўпэўнены, што ў гэтых іх паперак ёсць хоць нейкая юрыдычная сіла, думаю, гэта проста чарговая аперацыя па застрашванні людзей.
 

"Падчас сустрэчы растлумачаць, не хвалюйцеся"

Каб даведацца афіцыйную прычыну міліцэйскіх рэйдаў па былых палітычных асуджаных, карэспандэнт Еўрарадыё, назваўшыся чалавекам, да сябра якога прыходзіў участковы, патэлефанаваў у некалькі беларускіх РАУС у розных гарадах. 

Усюды мы атрымалі розныя адказы.

Напрыклад, у наваполацкім РАУС нам з упэўненасцю паведамілі, што наведванне міліцыяй такога чалавека — пытанне часу.

— Калі да вас не прыходзілі — значыць, яшчэ прыйдуць.

—  А з чым гэта наогул звязанае?

— З вамі зкантактуюць і ўсё падчас сустрэчы растлумачаць, не хвалюйцеся.

— А калі мяне дома не будзе?

— Тады звяжамся з вамі па тэлефоне.

— Звычайна я не падымаю званкі з незнаёмых нумароў.

— Значыць, прыйдзецца. Выбачайце, занадта шмат пытанняў, на якія па тэлефоне не адказваюць, — паведаміў нам супрацоўнік Наваполацкага РАУС.

"Калі будзе неабходнасць, каб да вас прыйшоў участковы, то ён прыйдзе"

У Наваполацку, здаецца, прыйдуць да ўсіх, а што ў сталіцы? Тэлефануем у Маскоўскі РАУС.

— Калі будзе неабходнасць, каб да вас прыйшоў участковы, то ён прыйдзе, калі неабходнасці няма, то не прыйдзе.

— А гэта неяк звязанае з выбарамі, якія скора будуць?

— Я не ведаю, ці павінны да вас прыйсці. Падыдзіце на апорны пункт міліцыі, які вас абслугоўвае. Вам усё патлумачаць.
 

"Ці трэба, каб прыйшлі?”

Тэлефануем у Гомельскі РАУС і зноў чуем хоць і падобны, але ўсё ж такі іншы адказ.

— Ну, радуйцеся, што да вас не прыходзілі, ці вы хочаце, каб прыходзілі?

— Я проста спрабую зразумець, па якім прынцыпе ўчастковы выбірае, да каго прыходзіць.

— Ну дык а што ў гэтым дрэннага, калі да вас не прыйшлі? Ці трэба, каб прыйшлі?

— А навошта наогул да кагосьці прыходзіць?

— Наогул ходзяць па адрасах зараз участковыя, праверка, абыход жыллёвых памяшканняў.

— Гэта звязанае з выбарамі?

— Ды пры чым тут выбары, што вы ўсе з гэтымі выбарамі... Ніякага дачынення выбары да хаджэння ўчастковых па адрасах не маюць.

Пад канец мы патэлефанавалі ў Клімавіцкі РАУС. Тут нас папрасілі назваць прозвішча, а яшчэ расказалі, што ўчастковы можа прыйсці для правядзення прафілактычнай гутаркі.

— Калі вы прозвішча сваё скажаце, то я магу вам сказаць, прыйдуць да вас ці не прыйдуць.
 

Што адбываецца?

Праваабарончы цэнтр "Вясна" ў пачатку лістапада паведамляў, што ў Беларусі сілавікі шукаюць тых, каго затрымлівалі пасля выбараў 2020 года: участковыя маюць спісы такіх людзей і наведваюць іх па чарзе па месцы жыхарства. Некаторых з іх затрымлівалі.

— Гэта выглядае як спланаваная акцыя запалохвання перад выбарамі. Сілавікі прыходзяць у асноўным да тых, хто раней затрымліваўся паводле пратэсных адміністрацыйных артыкулаў. Вядома пра выпадкі жорсткіх затрыманняў з неабгрунтаваным ужываннем сілы, — расказалі ў "Вясне".