Дырэктарку школы ў Буда-Кашалёве судзілі за "распаўсюд экстрэмізму"
Алена Некрашэвіч / ctv.by
У Буда-Кашалёве па абвінавачанні ў "распаўсюдзе экстрэмізму" судзілі дырэктарку школы Алену Некрашэвіч.
Адміністрацыйны суд адбыўся 13 лютага. Працэс вёў суддзя Канстанцін Скорын, пішуць праваабаронцы з "Гомельскай Вясны".
Алена Некрашэвіч прынамсі да апошняга часу працавала дырэктаркай сярэдняй школы №1 у Буда-Кашалёве. Адначасова жанчына была намесніцай старшыні Буда-Кашалёўскай раёнай арганізацыіі рэспубліканскага грамадскага аб'яднання "Белая Русь" — праўладнай структуры. На некалькіх апошніх выбарах, як паведамляюць праваабаронцы, яна ўваходзіла ў склад участковых выбарчых камісіяў.
У лістападзе 2024-га Некрашэвіч стала пераможцай абласнога фестывалю кіраўнічага майстэрства "Менеджмент у адукацыі: ідэі, рашэнні, перспектывы".
У зводках пра суды за "экстрэмізм" апошнім часам нярэдка фігуруюць людзі на заўважных пасадах і з праўладных арганізацый. Падставай для такіх судоў часцей за ўсё становяцца падпіскі на рэсурсы, якія рэжым Лукашэнкі назваў "экстрэмісцкімі".
