Фота ў Тындэры, катафоты, сабака: самыя бязглуздыя прычыны, за якія судзяць у РБ

Фота сабачкі

Фота сабакі каштавала жыхарцы Наваполацка 3,7 тысяч рублёў. У сваіх "Аднакласніках" жанчына размясціла здымак з сабакам, апранутым у чырвоны камбінезон. У акаўнце знайшлі і словы "Жыве Беларусь! Гвалту не!" У выніку, "па сукупнасці", гэта палічылі "масавым мерапрыемствам", праведзеным без дазволу райвыканкама.

Колеры манікюру і ваннай

"На яе пазногцях красавала забароненая сімволіка", — так у эфіры мясцовага тэлеканала расказвалі, за што пакаралі жыхарку Магілёва. І не, гэта не жарт. Не спадабалася сілавікам і прапагандыстам і ванна ў яе дома, дзе спалучаюцца белая і чырвоная плітка.

У дадатак да ўсяго, у яе дома знайшлі ўкраінскі і бел-чырвона-белы сцягі, але ўжо пасля затрымання. Штраф — 100 базавых велічынь, гэта значыць 3,7 тысячы рублёў.

"Экстрэмісцкая” малітва

Тут пакаранне панёс не канкрэтны чалавек, а цэлая царква. Гаворка ідзе пра пратэстанцкую царкву "Новае жыццё". Ва ўладаў прэтэнзіі да царквы вельмі даўно, але апошняй кропляй сталі рэакцыя вернікаў на рэпрэсіі 2020-га.

"Экстрэмісцкай" рэжым палічыў малітву, дзе гаварылася, што "Ісус Хрыстос сёння з параненымі, асуджанымі і нявінна пацярпелымі". Крок за крокам усё дайшло да афіцыйнай ліквідацыі царквы.