Галявая перадача Шкурына дапамагла “Легіі” атрымаць перамогу ў Экстракласе

Выніковае дзеянне беларускага футбаліста Іллі Шкурына за новую каманду — варшаўскую “Легію” — дапамагло клубу атрымаць перамогу над “Слёнскам” з лікам 3:1.

Шкурын выйшаў у стартавым складзе і аддаў выніковую перадачу, якая прывяла да першага ўзяцця брамы.

У першым тайме беларус мог і сам забіць, але пасля яго ўдару брамнік дакрануўся да мяча кончыкамі пальцаў, той змяніў траекторыю і трапіў у штангу.

У другім тайме Шкурына замянілі — гэта адбылося на 64-й хвіліне.

Такім чынам, у сваім трэцім афіцыйным матчы за новы клуб Ілля Шкурын адзначыўся выніковым дзеяннем. Паводле сэрвісу Sofascore, у беларуса адна з найлепшых адзнак за гульню — 7.5. Вышэй толькі ў Барташа Капусткі (7.6) і Марка Гуаля (7.7).

Хто такі Ілля Шкурын?

Беларускі футбаліст стаў гульцом варшаўскай "Легіі" 20 лютага. Форвард падпісаў з польскім клубам трохгадовы кантракт. Кошт трансферу склаў 1,5 млн еўра і стаў трэцім па кошце за ўсю гісторыю Экстраклясы.

Іллю Шкурыну 25 гадоў. У 2019-м ён стаў найлепшым бамбардзірам чэмпіянату Беларусі, у складзе "Энергетыка-БДУ" забіў 19 галоў. Пасля былі ЦСКА, кіеўскае "Дынама" і польскі "Ракув".

У 2022-2023 гадах беларус гуляў у Ізраілі і зноў стаў шмат забіваць. Пераход у польскую "Сталь" аказаўся ўдалым: у першым сезоне Шкурын забіў 16 галоў (другое месца сярод бамбардзіраў чэмпіянату Польшчы). У 19 матчах гэтага сезону форвард забіў 5 галоў і аддаў 2 галевыя перадачы.

"Сталь" — серадняк, а "Легія" займае пятае месца ў Экстракласе.

У 2020-м Ілля Шкурын падтрымаў пратэсты супраць фальсіфікацыі выбараў і выступіў супраць гвалту з боку сілавікоў. Ён тады заявіў, што не будзе выступаць за нацыянальную зборную Беларусі, пакуль краінай кіруе Аляксандр Лукашэнка.