Генерал Чаргінец у мемуарах прызнаў "памылку": ён не верыў Лукашэнку
Мікалай Чаргінец падпісвае адну са сваіх шматлікіх кніг / zviazda.by
Генерал і пісьменнік Мікалай Чаргінец выдае шматтомныя аўтабіяграфічныя раманы "Цяжкія дарогі жыцця". На прэзентацыі ў Нацыянальнай бібліятэцы Беларусі ён прадставіў аж 4 кнігі. У двух з іх — успаміны з 1940-х да 1990-х гадоў. Тым часам рыхтуецца яшчэ адзін том мемуараў, які выйдзе сёлета. У ім Чаргінец піша пра развал СССР і першыя гады незалежнай Рэспублікі Беларусь.
На прэзентацыі Мікалай Чаргінец прыгадаў, што пазнаёміўся з Аляксандрам Лукашэнкам у пачатку 1990-х. А пасля прызнаўся ў "памылцы".
"Я на той момант не верыў, што малады хлопец з вёскі зможа дапамагчы беларусам, — цытуе словы Чаргінца "Звязда". — Я памыліўся".
Мікалаю Чаргінцу 86 гадоў. Ён служыў у міліцыі, даслужыў да звання генерала. З 1970-га пачаў пісаць прозу, аўтар дзясяткаў кніг, кінасцэнароў. Чаргінец — першы рускамоўны літаратар у нашай краіне, які стаў "народным пісьменнікам" (атрымаў гэтае званне ад Лукашэнкі ў чэрвені 2022-га). Ён быў членам Савета Рэспублікі, працяглы час ачольваў праўладны саюз пісьменнікаў (цяпер ужо толькі ганаровы яго старшыня).
