Генпракуратура паскардзілася прэм'еру на Мінабароны

Генпракуратура Беларусі паскардзілася прэм'ер-міністру Раману Галоўчанку на Мінабароны. Прычына — "сістэмныя парушэнні ў сферы ўвекавечання памяці аб загінулых мірных жыхарах у гады Вялікай Айчыннай вайны".

"Міністэрствам абароны..., мясцовымі выканкамамі, архіўнымі ўстановамі, іншымі арганізацыямі архіўна-даследчая дзейнасць па ўстанаўленні імён ахвяр генацыду не арганізавана і на сістэмнай аснове не праводзіцца... Мэтанакіраваная дзейнасць па ідэнтыфікацыі ахвяр генацыду на падставе архіўных крыніц не праводзіцца, адказныя асобы не прызначаныя...", — цытуе ліст генпракурора Андрэя Шведа (верагодна, ад 2024 года) BELPOL.

З ліста высвятляецца, што больш за 1,6 млн забітых і пахаваных у Беларусі падчас вайны "працягваюць заставацца невядомымі". Пры гэтым супрацоўнікі пракуратуры высветлілі, што існуе "значная колькасць архіўных крыніц, якія ўтрымліваюць персанальныя даныя загінулых і месцы іх пахавання". Але яны не даследуюцца. У выніку прозвішчы згаданых людзей не трапілі ў "Кнігі Памяць" і на помнікі.

Мінабароны дасталося за тое, што яно атрымала "функцыю каардынацыі дзейнасці дзяржаўных органаў" у справе ўвекавечання памяці аб загінулых падчас вайны. Аднак архіўна-даследчыя працы не праводзяцца. Не выканана і патрабаванне Генпракуратуры ад сакавіка 2021-га аб стварэнні рэспубліканскага банка даных "Кніга Памяці Рэспублікі Беларусь".

Таксама адзначаецца, што адпаведнай камісіяй пры ўрадзе "за апошнія гады не вернута ніводнай арыгінальнай культурнай каштоўнасці перыяду Вялікай Айчыннай вайны". Былі выяўлены і іншыя парушэнні, і бяздзейнасць чыноўнікаў.

"Матэрыялы крымінальных спраў па генацыдзе, якія праводзяцца лукашэнкаўскімі службамі і якія не маюць ніякай культурнай або гістарычнай каштоўнасці, аператыўна выкарыстоўваюцца ў адукацыйнай і прапагандысцкай працы, — піша BELPOL. — Для рэжыму Лукашэнкі памяць пра вайну — гэта толькі інструмент для апраўдання рэпрэсіўнай палітыкі і ўмацавання дзяржаўнай прапаганды".