"Гэта перабор", — сказаў Каранік спартоўцу, які прасіў прысвоіць яму званне

Пяціразовы чэмпіён свету па гіравым спорце, майстар спорту міжнароднага класа Ігар Сігневіч, папрасіў прысвоіць яму ганаровае званне "Заслужаны майстар спорту Рэспублікі Беларусь". Ён пабываў на прыёме ў віцэ-прэм'ера Уладзіміра Караніка, які наведаў Пухавіцкі раён. 45-гадовы Сігневіч спадзяваўся, што Каранік падтрымае яго хадайніцтва аб прадстаўленні да ўзнагароджання згаданым званнем.

"Званне чэмпіёна вы атрымалі, — цытуе словы Уладзіміра Караніка "Мінская праўда". — Але трэба разумець, што "заслужанага майстра спорту Рэспублікі Беларусь" прысвойваюць не толькі за спартовыя дасягненні. Гэта ганаровае званне, якое больш, чым медалі і тытулы... Але 25 вашых адміністрацыйных правапарушэнняў — гэта перабор. Тэндэнцыя гэтая захоўваецца ўжо тры гады. Вы з зайздроснай рэгулярнасцю становіцеся фігурантам адміністрацыйнага працэсу".

Віцэ-прэм'ер нагадаў, што згаданае званне прысвойвае Аляксандр Лукашэнка. "Як мы патлумачым вашы 25 парушэнняў?" — спытаў ён. Сігневіч паабяцаў выправіцца.

"Нешта зрабіце з вашымі парушэннямі. І тады мы зможам ужо вярнуцца да гэтага пытання і разумець, што чалавек ўсведамляе наступствы сваіх дзеянняў і можа асабістым прыкладам паказаць, што і ў дарослым узросце людзі мяняюцца ў лепшы бок", — падвёў вынік размовы Каранік.

Якія менавіта адміністрацыйныя правапарушэнні ў Ігара Сігневіча, выданне не ўдакладняе. Ён, відаць, спадзяваўся, што яму залічыцца яго подпіс у 2020-м пад лістом спартоўцаў у падтрымку рэжыму Лукашэнкі. Але памыліўся.