"Інфаказачка" Бондарава трапіла на Акрэсціна за экстрэмізм

Гродзенская актывістка Вольга Бондарава, вядомая сваімі прарасійскімі поглядамі, была арыштаваная і змешчаная ў ізалятар на Акрэсціна. Паводле слоў яе мужа Аляксандра, яе пакаралі паводле артыкула, звязанага з «экстрэмізмам», паведамляе выданне "Белсат".

Адвакат Бондаравай паведаміў, што прычынай затрымання мог стаць рэпост матэрыялаў, прызнаных экстрэмісцкімі. Аляксандр упэўнены, што арышт быў спланаваны, і сцвярджае, што за жонкай сачылі і кантралявалі яе дзейнасць.

Паводле меркавання мужа, прычынай арышту маглі стаць як яе скаргі на Ганну Сялук — нявестку Аляксандра Лукашэнкі, так і канфлікт з кімсьці ў асабістай перапісцы. Вольга Бондарава таксама спрабавала ўзяць удзел у выбарах у Мінскі гарадскі савет, што, паводле слоў Аляксандра, выклікала хвалю негатыву ў яе адрас.

Нягледзячы на арышт, Бондарава, паводле слоў мужа, захоўвае баявы настрой і не збіраецца змяняць сваю пазіцыю.