Лукашэнка расказаў, якую праблему "вагнераўцы" выявілі ў вайскоўцаў у Беларусі

13 лютага на нарадзе, прысвечанай праблемам вышэйшай адукацыі, Аляксандр Лукашэнка загаварыў пра беларускае войска. Ён заклікаў зрабіць так, каб маладыя беларусы не баяліся ісці ў армію.

"Чаму людзі баяцца ісці ў армію? — гаварыў Лукашэнка. — Таму што там цяжка і муштры хапае, за што я вайскоўцаў цяпер нахіляю і нахіляю... Кампактная рэспубліка, дарослыя хлопцы, навошта іх муштраваць?! Вось "вагнераўцы" з намі папрацавалі. Галоўная выснова: фізічна не ўсе гатовыя. А як ваяваць, калі ты фізічна не гатовы?!".

Аляксандр Лукашэнка прапануе "замест дзікай страявой падрыхтоўкі" падцягнуць у вайскоўцаў фізічную падрыхтоўку, а таксама агнявую і тактычную. "Так як трэба, але без муштры, без здзекаў, без "дзедаўшчыны", — дадаў ён. І прапанаваў даваць вайскоўцам тэрміновай службы ў суботу выходны.

Расійскія найміты з ПВК "Вагнер" з'явіліся ў Беларусі летам 2023-га пасля іх "паходу на Маскву". У Асіповіцкім раёне Магілёўскай вобласці яны стварылі вялізны лагер. Сотні "вагнераўцаў" працавалі і працягваюць працаваць, як інструктары, з сілавікамі ў РБ. Праз іх "трэніроўкі" праходзілі і вайскоўцы, і байцы спецпадраздзяленняў унутраных войскаў. Між іншым, іх вучылі ўдзелу ў баявых дзеяннях — штурму акопаў, будынкаў.

Па звестках брытанскай разведкі, у РБ засталося менш за тысячу "вагнераўцаў".