Рада культуры пачала размеркаванне 2 млн еўра ЕС: у заяўках просяць у разы больш
Беларуская культура вымушана неяк жыць без дзяржаўнага бюджэта / калаж Улада Рубанава, Еўрарадыё
Праект Беларускай рады культуры ArtPower Belarus вылучае гранты для беларускіх дзеячаў мастацтва. Усяго прадугледжана 2 мільёны еўра. 21 красавіка абвясцілі вынікі першага кола падтрымкі, у выніку якога размеркаваныя 485 тысяч еўра.
Еўрарадыё спытала ў кіраўніка Рады культуры Сяргея Будкіна, куды пойдуць грошы, колькі ў беларусаў ідэй і чаму 2 мільёны — гэта зусім няшмат.
“Падалі праектаў на 7 мільёнаў 200 тысяч еўра”
440 тысяч еўра размеркаваныя паміж 16 прэтэндэнтамі на мідзі-гранты (да 60 тысяч еўра кожны). Яшчэ больш за 25 тысяч пойдуць на 6 міні-грантаў. Больш за 20 тысяч еўра для 9 чалавек, якія атрымаюць гранты мабільнасці. Іх можна скарыстаць для паездак, навучання ці даследаванняў.
— Мы абвесцілі пра вынікі адбораў на першы конкурс па мідзі-праектах праграмы ArtPower Belarus, якую рэалізуем разам з Дацкім інстытутам культуры пры падтрымцы Еўракамісіі, — кажа Сяргей Будкін. — На першым коле ў нас былі рэсурсы падтрымаць ідэі ад культурных дзеячаў на агульную суму 440 тысяч еўра. Бюджэтная мяжа праектаў была 60 тысяч еўра. А падалі нам праектаў на 7 мільёнаў 200 тысяч еўра. З гэтага можна зрабіць выснову, наколькі малыя ёсць рэсурсы і наколькі вялікія прапановы творцаў. Гэта, безумоўна, натхняе. З другога боку, канешне, сумна, што толькі адна дзясятая частка праектаў была падтрыманая. Вартыя падтрымкі больш, чым сотня ідэяў, дакладна.
Сяргей Будкін адзначае, што з пачаткам паўнамаштабнага ўварвання Расіі ва Украіну праграмы падтрымкі пераарыентаваліся на Украіну. Але Рада культуры разам з актывістамі з іншых арганізацый працуе над дарожнай мапай па супрацоўніцтву з Еўрапейскім саюзам.
— Гэта не проста падтрымка культурных праектаў. Гэта ўплыў на захаванне незалежнасці нашай краіны. У дарожнай мапе мы канкрэтна аналізуем патрэбы кожнай сферы і выпрацоўваем рэкамендацыі, якім чынам можна дапамагчы. Таксама мы працуем з Офісам Святланы Ціханоўскай, каб падчас сваіх візітаў яна закранала важнасць тэмы культуры. Будзем працаваць з гэтым больш шчыльна. Мы разумеем ужо нават па выніках першага конкурсу, наколькі шмат ідэяў. Фактычна мы не маем нейкага альтэрнатыўнага дзяржаўнаму бюджэту на культуру, які складае ў розных краінах дзясяткі мільёнаў еўра, — падводзіць рысу Сяргей Будкін.
