Стала вядома, якая кніга Стывена Кінга першай выйдзе па-беларуску
Джэк Нікалсан у галоўнай ролі ў фільме "Ззянне" / The Producers Circle Company, Peregrine Productions, Hawk Films
Стала вядома, якая з кніг Стывена Кінга першай выйдзе па-беларуску. Пра гэта Еўрарадыё расказаў выдавец Андрэй Янушкевіч, які падпісаў кантракт з амерыканскім пісьменнікам.
"Гэта раман "Ззянне", які ўпершыню быў апублікаваны ў 1977 годзе. Яго можна лічыць узорным творам, напісаным у жанры “horror”, у якім працуе пісьменнік. Мы пачынаем з лепшага і плануем выдаць кнігу ўжо ў снежні гэтага года. А перакладзе раман на беларускую мову Анастасія Карнацкая", — расказвае выдавец.
У рамане "Ззянне" распавядаецца гісторыя пісьменніка Джэка Торанса, які ўладкоўваецца наглядчыкам пустога горнага гатэля ў зімовы перыяд. У ізаляцыі ад знешняга свету пісьменнік вар'яцее, бачыць здані і пачынае пераследаваць уласную сям'ю.
У 1980-м Стэнлі Кубрык зняў паводле рамана фільм з Джэкам Нікалсанам у галоўнай ролі. Крытыкі прызналі стужку эталонам псіхалагічнага трылера.
