“Гэта толькі пачатак”. Выдавец Андрэй Янушкевіч пра кантракт са Стывенам Кінгам

20/04/2023 - 13:25

Выдавец Андрэй Янушкевіч / здымак Юліі Цімафеевай

Выдавец Андрэй Янушкевіч / здымак Юліі Цімафеевай

“Карацей кажучы, нам адказалі, што гэта цудоўная ідэя і яны хочуць нас падтрымаць у нашым жаданні адкрыць для Стывена Кінга беларускую мову”, — расказвае Андрэй Янушкевіч пра тое, як ён дамовіўся на выданне перакладу кнігі караля жахаў у сваім выдавецтве.

Вядомы амерыканскі пісьменнік быў адным з першых аўтараў, які сказаў жорсткае “не” Расіі пасля яе нападу на Украіну і скасаваў там усе дамоўленасці на выданне сваіх бэстсэлераў. Затое знайшоў патрэбным падтрымаць беларускіх чытачоў, улічваючы складаную сітуацыю, у якой аказаліся беларускія літаратары і выдаўцы пасля выбараў у 2020 годзе.

У інтэрв’ю Еўрарадыё Андрэй Янушкевіч, які быў вымушаны пакінуць радзіму, дзеліцца навінамі свайго выдавецтва, гаворыць пра тое, што натхняе на працу за мяжой, і як атрымліваецца дамаўляцца на супрацу з вядомымі замежнымі пісьменнікамі.

Андрэй Янушкевіч: Я цудоўна разумею, што, каб выдавецтва працягвала працаваць, трэба не проста не спыняцца, а нават не збаўляць тэмпаў. Нават у новых варунках тое, што мы знаходзімся за мяжой Беларусі — не падстава апускаць рукі, бо гэтага толькі і чакаюць нашыя ворагі, марачы атрымаць чарговы доказ таго, што ў “самотных беларусаў” нічога не атрымліваецца. Таму мы думаем пра перспектывы, бачым іх ясна, не заўсёды ўсё выглядае пазітыўна, але, як казаў адзін палітык, “працэс ідзе”.

Сапраўды, сёння я ўсіх магу парадаваць навіной пра тое, што мы падпісалі кантракт на выданне першай кнігі Стывена Кінга! Гэтага пісьменніка прадстаўляць не трэба. Што гэта за кніга, пакуль не скажу. Магу толькі паведаміць, што пераклад у працы, і я вельмі спадзяюся, што ў снежні 2023 года мы прадставім кнігу беларускім чытачам. І гэта толькі пачатак выдання твораў Стывена Кінга.

Праз рашэнне аўтара цяпер перавыданні яго кніг у Расіі не выходзяць. Я думаю, мы мусім тут перахапіць ініцыятыву і даць беларусам магчымасць чытаць творы караля жахаў на беларускай мове — гэта будзе проста цудоўна.

Еўрарадыё: Ці выдаваўся Стывен Кінг у Беларусі раней? Наколькі актуальныя сёння яго кнігі?

Андрэй Янушкевіч: Гэта першы досвед. Раней ягоныя кнігі ў нас не выдаваліся нават у пірацкіх, неліцэнзаваных выданнях. Можна прывесці статыстыку: нават калі ўзяць тую ж Расію (а кнігі з расійскага рынку свабодна паступаюць у Беларусь), то ўжо колькі гадоў Стывен Кінг быў па продажах пісьменнікам №1 у нашай усходняй суседцы. То-бок ягоныя кнігі ў сукупнасці прадаваліся самымі вялікімі накладамі. Тое, што пісьменнік, які піша 40-50 гадоў, захоўвае сваю актуальнасць — феномен.

Еўрарадыё: Пакуль вы трымаеце ў сакрэце назву кнігі. Можаце хаця б расказаць, будзе гэта нешта новенькае ці штосьці з таго, што ўжо выдавалася на іншых мовах?

Андрэй Янушкевіч: Не, не буду нічога казаць. Я вельмі хачу, каб больш людзей прыйшло на кніжную выставу, якая пачнецца ў Беластоку 21 красавіка. І няхай гэта будзе для іх дадатковай матывацыяй. Імя перакладчыка таксама патрымаю ў таямніцы. Захаваем інкогніта.

Еўрарадыё: Стывен Кінг адмовіўся выдавацца ў Расіі, але на прапанову з Беларусі адрэагаваў пазітыўна. Як гэта было?

Андрэй Янушкевіч: Так, тут быў цікавы досвед, бо Беларусь часта згадваецца як краіна — сатэліт Расіі. На жаль, наша дзяржава ідзе ў адной запрэжцы з суседкай.

Дык вось, мы патлумачылі, хто мы такія, якой была наша гісторыя ў апошнія гады і што азначае выданне кніг Стывена Кінга не толькі ў плане эканамічна-рынкавым, але і ў такім вось сацыяльна-нацыянальным кантэксце.

Вельмі хутка пасля гэтага мы атрымалі пазітыўную рэакцыю на нашы прапановы. Так што не хачу быць галаслоўным і казаць, што пісьменнік праявіў з намі салідарнасць, але сам факт падпісання кантракту і выдання кніг будзе ў гэтым плане вельмі красамоўным.

Еўрарадыё: Можна больш падрабязнасцяў пра выставу, якая пройдзе ў Беластоку?

Андрэй Янушкевіч: Выстава будзе праходзіць тры дні на гарадскім стадыёне. Там шмат месца, бясплатны ўваход і паркоўка. З усёй Польшчы будзе прадстаўлена амаль 100 выдавецтваў, будзе безліч кніг, і вельмі радасна, што будзе сапраўды шырокі асартымент беларускіх кніг, якія прыедуць да нас як з Беларусі, так і з выдавецтваў, якія працуюць за яе межамі.

Будзе ажно шэсць навінак, і сярод аўтараў гэтых прэм’ер — такія вядомыя імёны, як Наста Кудасава і Валер Гапееў. Таксама можна будзе набыць дадрук кніг пра Гары Потэра. Гэтага шмат хто даўно чакаў. Цяпер усе тры часткі, якія мы паспелі выдаць у Беларусі, зноў даступныя чытачам. На жаль, навін па чацвёртай у мяне пакуль няма.

Еўрарадыё: То-бок ужо заўтра можна будзе даведацца, што гэта за кніга Стывена Кінга, якую перакладзе на беларускую мову і выдасць выдавецтва “Янушкевіч”?

Андрэй Янушкевіч: Так, з дзесяці гадзін выстава працуе, і кожнаму, хто прыйдзе, буду шаптаць на вушка.