Трамп заявіў, што "раз'юшаны" паводзінамі Пуціна і прыгразіў новымі санкцыямі

Прэзідэнт ЗША Дональд Трамп патэлефанаваў журналістцы NBC News Крыстэн Уэлкер і сказаў ёй, што "раз'юшаны" паводзінамі Уладзіміра Пуціна, прыгразіўшы ўвесці другасныя санкцыі на расійскую нафту.

"Калі мы з Расіяй не зможам заключыць здзелку, каб спыніць кровапраліцце ва Украіне, і калі я вырашу, што ў гэтым віна Расіі — што можа быць і не так, але калі я так вырашу — я ўвяду другасныя санкцыі на ўсю расійскую нафту", — заявіў Трамп.

Паводле яго слоў, пошліны ў памеры 25-50% на расійскую нафту могуць быць уведзеныя на працягу месяца, калі не будзе пагаднення аб спыненні агню. Другасныя пошліны могуць распаўсюдзіцца і на іншыя расійскія тавары, якія прадаюцца ў ЗША.

"Будзе так: калі вы купляеце нафту ў Расіі, вы не можаце весці бізнес з ЗША. Будуць пошліны — ад 25% да 50% на ўсю нафту", — сказаў Трамп.

Таксама Трамп заявіў, што "быў вельмі злы, раз'юшаны, калі Пуцін пачаў прычапляцца да легітымнасці Зяленскага і завёў размову пра новае кіраўніцтва ва Украіне".

Новы званок з Пуціным, паводле слоў Трампа, запланаваны ўжо на гэтым тыдні.

Акрамя таго, Трамп прыгразіў бамбіць Іран, калі ён не пойдзе на ядзерную здзелку.