У Беларусі перабоі з вакцынацыяй ад COVID-19, хоць колькасць заражэнняў расце

27/09/2024 - 18:04

"Прышчапляцца трэба было, пакуль вакцына была"

"Прышчапляцца трэба было, пакуль вакцына была" / unsplash.com

— Хацела прышчапіцца ад "кароны", а ў паліклініцы сказалі — "не прышчапляем, таму што няма вакцыны". Гэта наогул нармальна? Так па ўсёй краіне?

У Беларусі сапраўды перабоі з вакцынацыяй ад COVID-19. У адных паліклініках апошні раз вакцынавалі ў сакавіку, у іншых — ахвочых просяць паспяшацца, таму што засталося ўсяго некалькі доз. У многіх медустановах не прышчапляюць, таму што вакцын няма і калі яны з'явяцца — невядома.

Пра ўсё гэта журналістцы Еўрарадыё расказалі ў беларускіх установах аховы здароўя, у якія яна звярнулася, назваўшыся пацыенткай.

— І, калі шчыра, была шакаваная сітуацыяй.

Гродна — "калі з'явіцца, невядома"

У гарадской паліклініцы №7 горада Гродна кажуць, што вакцынавацца можна.

— У нас прышчапляюць расійскай вакцынай "Спутнік Лайт", яшчэ той, якой прышчаплялі ў 2021-2022 гадах. Таксама вывучаем попыт на вакцыну з абноўленым штамам з абаронай ад амікрона [штам "амікрон" пераважае з канца 2021 года. — Еўрарадыё]. Яе ў нас няма. Калі з'явіцца і ці з'явіцца наогул, пакуль не ведаем. Калі цікавіць, можам запісаць вас у ліст чакання і потым патэлефанаваць.

Цяпер людзі прыходзяць і вакцынуюцца той вакцынай, якая ёсць. Вядома, варта так рабіць. Невядома, прыйдзе новая ці не, а абараняцца трэба.

Кітайскай вакцыны больш няма ні ў каго і не будзе — гэта была гуманітарная дапамога. Так што пакуль — толькі расійская.

— Я ўдакладняла ў загадчыцы. Яна кажа, што пакуль што мы прышчэпкі не робім. Калі будуць рабіць, яна не ўдакладняе. Магчыма, проста няма вакцыны, — расказваюць у рэгістратуры 6-й паліклінікі.

У паліклініцы №4 папярэджваюць: "Прышчэпка — гэта ваша асабістая справа, але што тычыцца таго, хварэюць людзі ці не... колькасць хворых павялічваецца з кожным днём".

Ад Covid-19 тут прышчапляюць усё той жа вакцынай "Спутнік Лайт".

— Прышчапляем кожны дзень. Гэта яшчэ старая вакцына. Абноўленая пад амікрон (таксама расійская), павінна з'явіцца ў кастрычніку, але калі — мы не ведаем. Калі хочаце, можаце пачакаць да сярэдзіны месяца. Вакцына ж ёсць, але калі будуць выдаваць, невядома. Кітайскімі не прышчапляем, бо няма паставак.

Тэлефануем у паліклініку №3. Тут не вакцынуюць не толькі ад "кароны", але і ад грыпу.

— Мы яшчэ не атрымалі вакцыны, — тлумачаць у прышчэпачным кабінеце. — Чакаем вакцыну супраць грыпу, адначасова будзем рабіць і супраць COVID-19. Да нас мусіць прыйсці вакцына "Спутнік Лайт". Інфармацыі, ці арыентаваная яна на новы штам, у мяне няма.

— Атрымліваецца, у нас нельга прышчапіцца? Столькі людзей хварэе…

— Ну неяк так…

— А чаму трэба дачакацца вакцыны супраць грыпу, каб калоць ад COVID-19?
— Ну таму што мы так вырашылі — будзем рабіць іх разам. Так зручней і не трэба чакаць нейкія інтэрвалы. Інтэрвал паміж прышчэпкамі павінен выконвацца, дапусцім — два тыдні [СААЗ сцвярджае, што прышчапляцца адначасова бяспечна. — Еўрарадыё]. Вось і ўсё. Мы будзем рабіць разам супраць грыпу і COVID-19. Хто прыйдзе на COVID-19 асобна, будзем рабіць асобна. Вось зараз прыйсці і зрабіць вы не можаце, бо ў нас няма вакцыны.
— А калі на наступным тыдні не будзе вакцыны, куды можна напісаць, каб яна з'явілася?
— Не трэба нікуды пісаць. Я, напрыклад, упершыню чую, што вы хочаце зрабіць прышчэпку. Калі б вы звярнуліся раней, мы б атрымалі ну выключна для вас адной прышчэпку і вы б яе зрабілі.

— Ну, пачакайце, надыходзіць сезон. Людзі ідуць і робяць прышчэпкі. Як гэта ў вас няма вакцыны?

— Ну неяк так.

— То-бок калі на наступным тыдні вакцына не з'явіцца, можна патэлефанаваць і вы замовіце?

— Мы замовім.

В Беларуси перебои с вакцинами от COVID-19, хотя число заражений растёт

Не забывайце мыць рукі / unsplash.com

Гомель — "засталося толькі пяць доз"

У інфекцыйным кабінеце Гомельскай паліклінікі №2 кажуць, што людзей, якія хварэюць на розныя вірусныя інфекцыі, шмат — "сёлета сезон пачаўся раней". Ёсць тыя, у якіх COVID-19, але пакуль вакцын няма ні ад яго, ні ад грыпу. Старыя вакцыны скончыліся.

— Ад грыпу мусяць з'явіцца на наступным тыдні, а ад COVID-19 — невядома калі. Пакуль разнарадкі не было. Хутчэй за ўсё, гэта будзе "Спутнік Лайт". Ахвочыя прышчапляцца ёсць, проста, на жаль, пакуль няма чым. Нешта затрымліваюць нам пастаўку.

У восьмай паліклініцы кажуць, што "засталося ўсяго пяць доз", і гэта таксама "Спутнік Лайт". Каб прышчапіцца, трэба прыйсці ў рэгістратуру і атрымаць допуск да доктара.

— Мы не ведаем, ці з'явяцца новыя вакцыны, — уздыхаюць у прышчэпачным кабінеце.

Магілёў — вакцыны скончыліся ў канцы сакавіка

Тэлефануем у паліклініку №5 горада Магілёва. Тут кажуць, што вакцын "пакуль не давалі", і просяць тэлефанаваць час ад часу, маўляў "як толькі дадуць — пачнецца вакцынацыя".

— Пакуль наконт COVID-19 ніякай інфармацыі няма, — расказвае загадчыца тэрапеўтычнага аддзялення. — Усё што было — скончылася, калі б нешта засталося — прышчапілі б.

— Добра, паспрабуем прышчапіцца ў іншай паліклініцы.
— Нідзе наогул няма.
— Чаму? Сезон жа!
— Сезон, не сезон, а прышчапляцца трэба было, пакуль вакцына была.

— А яна ўвесь гэты час была?

— Яна была да вясны ў нас, напэўна. Напэўна, у канцы сакавіка вакцыны сканчваліся, мы прышчапілі астатнія і ўсё. Пакуль пра кавідную прышчэпку нічога нам не кажуць, але, напэўна, павінна нешта з'явіцца.

Віцебск — "штодня вакцынуем па 9-10 чалавек"

У Віцебскай паліклініцы № 3 кажуць, што вакцыны ёсць, як і попыт на іх. Людзі прыходзяць вакцынавацца штодня — па 9-10 чалавек.

— Кітая [вакцыны SARS-CoV-2 Vaccine (Vero Cell) вытворчасці кітайскай "Сінафарм". — Еўрарадыё] не будзе ўжо дакладна. Мы прышчапляем расійскімі "Спутнік Лайт" аднаразова і "Гам-КАВІД-Вак" [ён жа проста "Спутнік". — Еўрарадыё] двойчы — другую робім праз тры тыдні пасля першай.

Прышчэпка гэта вельмі важна / unsplash.com

Мінск — "пакуль яшчэ ёсць"

— Кажуць, што пакуль яшчэ ёсць вакцына "Спутнік Лайт", — адказваюць у рэгістратуры 12-й паліклінікі Мінска. — Прыходзьце ў "даведку", вам скажуць, у які кабінет падысці. Лекар правярае тэмпературу, ціск — глядзіць ваш агульны стан і дае дазвол. Усё, як і раней. Колькі засталося прэпарата, не ведаю.

У 25-й паліклініцы сталіцы таксама вакцынуюць, і таксама — толькі "пакуль яшчэ".

— Вакцына "Спутнік Лайт" пакуль ёсць, але можа і скончыцца, — папярэджваюць у рэгістратуры. — Так што, тэлефануйце, як надумаеце, запісвайцеся да памочніка лекара і вакцынуйцеся.

Брэст — "вакцына, якая ў нас ёсць, ужо не працуе"
У рэгістратуры паліклінікі №1 горада Брэста кажуць, што вакцына ёсць і можна прышчапляцца.
Каб даведацца падрабязнасці, тэлефануем у інфекцыйны кабінет, дзе... раяць не спяшацца.
— Давайце пачакаем. Мы павінны атрымаць новую вакцыну, якая будзе актуальнай. Як толькі атрымаем — прышчэпіцеся. Можам запісаць вас у журнал планавання.
— Што гэта будзе за вакцына?
— Мы не ведаем канкрэтна. Нам на семінары гэтага не агучвалі, але мы чакаем. Вакцына, якая ў нас ёсць, ужо не працуе на гэты вірус. Гэта "Спутнік Лайт". Новая вакцына будзе са штамам амікрон, а ў той, якая ёсць, гэтага штаму няма.
— Вы лічыце прышчапляцца старой вакцынай бескарысна?
— Лепш пачакаць. Тэлефануйце на наступным тыдні.