У МЗС Швейцарыі пракаментавалі рашэнне накіраваць пасла ў Беларусь

Уручэнне даверчых грамат не з'яўляецца актам прызнання Аляксандра Лукашэнкі, заявілі ў МЗС Швейцарыі на просьбу пракаментаваць рашэнне накіраваць пасла ў Беларусь. Пазіцыю швейцарскіх уладаў прыводзіць польскі тэлеканал, які асвятляе беларускія падзеі.

У Берне лічаць, што ўручэнне даверчых грамат — гэта толькі неабходная працэдура, каб усталяваць адносіны паміж афіцыйным прадстаўніком краіны і дзяржавай знаходжання. Гэтага патрабуе Венская канвенцыя аб дыпламатычных адносінах.

"Для Швейцарыі было важна заставацца прадстаўленай на самым высокім узроўні ў Мінску. Такім чынам, Швейцарыя можа выканаць сваю традыцыйную і прызнаную ролю ў якасці будаўніка мастоў для міжнароднай супольнасці. Швейцарыя бярэцца за гэта з неабходнай стараннасцю і ў поўнай салідарнасці з еўрапейскімі каштоўнасцямі і прынцыпамі", — заявілі тэлеканалу ў Берне.

Там таксама падкрэслілі, што рашэнне аб накіраванні новага пасла ў Мінск было прынята пасля стараннага вывучэння многіх абставінаў. У швейцарскім МЗС кажуць, што дыпламат  будзе імкнуцца данесці да беларускіх уладаў патрабаванні Швейцарыі, будзе дамагацца вызвалення ўсіх адвольна затрыманых, расследавання цяжкіх выпадкаў катаванняў і жорсткага абыходжання, а таксама свабоды выказвання меркаванняў.

Яшчэ адно пытанне, які будзе на кантролі новага пасла — гэта лёс грамадзянкі Швейцарыі Наталлі Хершэ.

"Амбасада Швейцарыі ў Мінску наведвала  спадарыню Хершэ чатырнаццаць разоў, апошні візіт быў 11 студзеня 2022 года", —  распавялі ў МЗС краіны.

Аб рашэнні Швейцарыі адправіць новага пасла ў Беларусь стала вядома ў канцы студзеня. Бэрн у Менску будзе прадстаўляць Крысціне Хонэгер-Залатухін.

Еўрапейскія краіны не прызналі вынікі прэзідэнцкіх выбараў 2020 года і Аляксандра Лукашэнку легітымным кіраўніком. З аглядкай на гэта ў мінулым годзе дыпламаты шэрагу еўрапейскіх краін адмовіліся ўручаць даверчыя граматы Лукашэнку. На цырымонію, у прыватнасці, не прыйшлі паслы Францыі, Грэцыі, Люксембурга.