За зборную Польшчы рыхтуецца выступаць яшчэ адна лёгкаатлетка з Беларусі
Марыя Жодзік / bfla.eu
За зборную Польшчы на Алімпіядзе ў Парыжы, магчыма, будзе выступаць лёгкаатлетка з Беларусі Марыя Жодзік, піша Onet.
Марыі Жодзік 27 гадоў, яна жыве ў польскім Беластоку з 2022 года. Яна займаецца скачкамі ў вышыню.
На чэмпіянаце па лёгкай атлетыцы Беларусі ў 2021 годзе дзяўчына паставіла асабісты рэкорд, узяўшы бар'ер 1 м 96 см. Яна атрымала права выступіць на Алімпіядзе ў Токіа, але не была дапушчаная да гульняў, бо беларускія спартовыя функцыянеры не забяспечылі своечасова працэдуру праходжання допінг-тэстаў.
Паводле звестак польскіх СМІ, Жодзік падала дакументы на польскае грамадзянства. Яе называюць найлепшай у сваёй дысцыпліне ў Польшчы. Калі лёгкаатлетка атрымае польскае грамадзянства і да 30 чэрвеня пакажа вынік у 1 м 97 см, то зможа ўдзельнічаць у Алімпійскіх гульнях. Праўда, ёсць некалькі ўмоваў. Ёй трэба дачакацца пастановы польскага прэзідэнта Анджэя Дуды на гэты конт. І патрэбна скараціць перыяд, на працягу якога яна не можа выступаць за іншую краіну — такое рашэнне можа прыняць Міжнародная асацыяцыя лёгкаатлетычных федэрацый.
У 2020-м Марыя Жодзік падпісала адкрыты ліст беларускіх спартоўцаў за свабодныя выбары і супраць гвалту з боку сілавікоў. Таксама яна асудзіла вайну Расіі супраць Украіны.
Па словах лёгкаатлеткі, пасля пераезду ў Польшчу яна спачатку працавала ў рэстаране Mcdonald's і трэніравалася без якой-небудзь дапамогі. Цяпер у яе ёсць польскі трэнер.
Першай лёгкаатлеткай, якая стала выступаць за Польшчу, была бягуха на кароткія дыстанцыі Крысціна Ціманоўская.
