Немцы мяркуюць, што быць таксай вельмі нязручна — #ІхНоравы

28/03/2024 - 15:25

#ІхНоравы / @rubanau_collage

Польская контрвыведка заявіла пра рэйды супраць расійскай шпіёнскай сеткі. Ператрусы па справе аб меркаваным расійскім шпіянажы прайшлі ў Варшаве.

Што яшчэ адбываецца ў свеце — у рэгулярным аглядзе Еўрарадыё.

Голад у Газе

Гуманітарная катастрофа ў сектары Газа ператвараецца ў штучна створаны голад, піша BBC. Самы высокапастаўлены чыноўнік ААН па правах чалавека Фолькер Цюрк заявіў, што Ізраіль нясе значную частку адказнасці за гэтыя пакуты грамадзянскага насельніцтва і штучна затрымлівае пастаўкі дапамогі.

Міністр эканомікі Ізраіля Нір Баркат назваў гэтыя словы "поўным глупствам і цалкам безадказным выказваннем". Ізраіль сцвярджае, што прымае ўсю гуманітарку, якую завозяць ЗША і іншыя краіны свету. А праблема нібыта ў ААН, якая не ў стане забяспечыць лагістыку (а частку дапамогі забірае ХАМАС).

Тым не менш, ВВС адзначае, што на мяжы з сектарам Газа прама цяпер стаіць доўгая чарга з грузавікоў, загружаных гуманітаркай. Грузавікі стаяць на егіпецкім баку, і не могуць заехаць толькі з-за Ізраіля.

Саудаўская Аравія за правы жанчын?

Саудаўскую Аравію абралі старшынёй Камісіі ААН, якая будзе працаваць на дасягненне гендэрнай роўнасці. Дзіўна, праўда? Праваабарончыя групы таксама былі здзіўленыя, таму што сітуацыя з правамі жанчын у каралеўстве не вельмі.

Але канкурэнтаў прадстаўніку Саудаўскай Аравіі на пасаду старшыні Камісіі па становішчы жанчын... не было. І калі падчас прызначэння папярэдні старшыня (прадстаўнік Філіпін) спытаў, ці ёсць пярэчанні, у зале стаяла цішыня.

Зрэшты, трэба сказаць, што за апошнія гады сёе-тое ў каралеўстве зрушылася з месца. Напрыклад, да 2016 года жанчыны ў Саудаўскай Аравіі павінны былі выходзіць з дому толькі ў суправаджэнні апекуна — гэты закон больш не дзейнічае. Шэраг іншых правілаў таксама былі адмененыя за апошнія гады.

Сабака-каўбасака

Таксы пад пагрозай. Нямецкі кіналагічны клуб Германіі хоча забараніць разводзіць сабак са "шкілетнымі анамаліямі". А сабака-каўбаса — гэта як бы анамалія і ёсць. У сабак з кароткімі лапкамі і доўгімі спінамі часта назіраюцца праблемы з хрыбтом — ці гуманна ствараць іх такімі?

Увогуле, вырашыць нямецкі ўрад. А аматары таксаў ужо запусцілі петыцыю і просяць не змагацца з селекцыяй. Маўляў, не так ужо таксы і пакутуюць ад сваіх кароткіх лапак.