Беларусам адмаўляюць у польскіх навучальных візах. Што зноў здарылася?

02/09/2024 - 13:38

Беларусам адмаўляюць у навучальных візах

Беларусам адмаўляюць у навучальных візах / hrodna.life

Беларусам пачалі адмаўляць у польскіх студэнцкіх візах. Прычым адмовы паступаюць не ад консула, а ад Міністэрства замежных спраў.

"Вы не абгрунтавалі мэту або ўмовы меркаванага знаходжання", — такі адказ атрымліваюць абітурыенты.

Акрамя таго, польскае консульства пачало патрабаваць сертыфікат ведання мовы і настрыфікацыю атэстата, хоць раней такіх патрабаванняў не было.

Пра гэта Еўрарадыё расказала прадстаўніца фракцыі "Моладзевы наступ" Каардынацыйнай рады Лізавета Пракопчык.

Што наогул адбываецца?

Паводле Пракопчык, ёй вядома мінімум пра 10 выпадкаў адмовы ў візах. Пра дакладную колькасць пацярпелых можна толькі здагадвацца.

Адзінае, што ў гэтай сітуацыі раяць польскія консулы, — падаваць дакументы на візу паўторна і далучаць дадатковыя паперы.

Аднак гэта не дае стапрацэнтнай гарантыі поспеху.

З чым могуць быць звязаныя адмовы?

Для гэтага вернемся крыху назад.

У траўні 2024 года Міністэрства адукацыі Беларусі адмовілася выдаваць беларускім абітурыентам даведкі, якія пацвярджаюць сапраўднасць атэстатаў. Гэты дакумент патрабавалі польскія ВНУ падчас паступлення.

У сітуацыю ўмяшаўся Анджэй Дуда, які падпісаў папраўкі ў законы пра дапамогу грамадзянам Украіны, што спрасціла прызнанне і беларускіх дакументаў адукацыі.

Як паведамляе "Белсат", цяпер пацверджанне заканчэння школы ў Беларусі можна атрымаць і ў Польшчы праз працэдуру настрыфікацыі — дзяржаўнага прызнання ў іншай краіне дыпломаў, навуковых ступеняў і званняў, атрыманых за мяжой. Гэтыя дакументы выдаюцца ўстановамі пад назвай Kuratorium Oświaty.

Аднак каб атрымаць гэты дакумент, неабходна падаць сертыфікат здачы ЦТ (цэнтралізаванага тэставання). Гэта значна ўскладняе жыццё беларусам, якія з'яўляюцца ўцекачамі і не могуць вярнуцца ў сваю краіну.

Замежнікі за парогам універа?

У Польшчы выбухнуў скандал, звязаны са студэнцкімі візамі проста напярэдадні навучальнага года.

У імкненні змагацца з неправамерным выкарыстаннем вучэбных віз польскае МЗС навязала замежным студэнтам дадатковыя ўмовы паступлення.

Раней, каб атрымаць студэнцкую візу, трэба было паказаць допуск да навучання з універсітэта, пацверджанне аплаты, а таксама запэўненне, што студэнт зможа забяспечваць сябе ў Польшчы.

Цяпер, пасля ўнесеных МЗС паправак, замежным абітурыентам неабходна атрымаць прызнанне свайго атэстата сярэдняй адукацыі праз тую ж польскую ўстанову Kuratorium Oświaty. Непадача гэтых дакументаў прывядзе да адмовы ў візе.

Універсітэты забілі трывогу, бо часу на выкананне новых патрабаванняў няма: перасылка дакументаў поштай зойме тыдні, плюс трэба ўлічваць час на іх разгляд консулам, а навучальны год пачынаецца ўжо 1 кастрычніка.

Польскія СМІ паведамляюць, што многія спецыяльнасці ў шэрагу ўніверсітэтаў могуць закрыць праз недабор замежнікаў. Паведамлялася, што з такімі праблемамі сутыкнуліся абітурыенты з Індыі, Алжыра, Катара і Туніса.

Чаго хоча дамагчыся МЗС?

Як пісала Gazeta Wyborcza, стаўленне польскіх уладаў да замежных студэнтаў змяніў візавы скандал. Міністэрства замежных спраў абвінавачвае замежнікаў у тым, што яны атрымліваюць студэнцкія візы, але па факце прыязджаюць у Польшчу працаваць.

Да рыторыкі польскага МЗС далучылася і намесніца міністра адукацыі Ёанна Муха, якая яшчэ ў пачатку жніўня заяўляла, што вядзецца маштабны працэс па ўзмацненні жорсткасці выдачы віз. І, здаецца, гэтыя абмежаванні цяпер закранулі і беларускіх абітурыентаў.