"Адпачыць за 500 еўра ўжо не атрымаецца": дзе беларусы змогуць пазагараць летам

28/03/2025 - 16:23

Лета / unsplash

Сітуацыя з шэнгенскімі візамі ў параўнанні з мінулым годам зрабілася толькі горшай, кажа Еўрарадыё галоўная рэдактарка Visa Flow Анастасія Лысакоўская. Таму адпачынак у Еўропе для беларусаў сёлета падаражэе. Даражэйшымі могуць зрабіцца і бязвізавыя краіны, бо на іх вырасце нагрузка.

— Сітуацыю ратуе адкрыццё новых кірункаў — напрыклад, Амана. Можна знайсці пакет за 1-1, 4 тыс. еўра. Але адпачыць, як раней, турам за 500-800 еўра ўжо не выйдзе, — кажа суразмоўца Еўрарадыё.

Мы ведаем, што вы ўжо стаміліся і, бывае, падумваеце пра тое, дзе праведзяце лета. Распыталі Анастасію, колькі грошай трэба адкласці беларусу, каб пачаць планаваць адпачынак.

Хачу ў адпачынак і няма шэнгена. Колькі грошай адкласці?

Без панікі. Заўсёды ёсць магчымасць злавіць тур "апошняй хвіліны". А калі вы не можаце дазволіць сабе раскошу ўсё кінуць і ў апошні момант сарвацца на мора? Тады разлічвайце, што добры пакет на аднаго чалавека абыдзецца як мінімум у тысячу еўра — і вышэй.

— І я не думаю, што гэтыя цэны будуць апускацца. Так што так, пакуль падарожжа — гэта дорага, асабліва калі ў вас няма шэнгена, — кажа Анастасія.

“Отдохнуть за 500 евро уже не получится”: где белорусы смогут позагорать летом

Лета / unsplash

Адсутнасць шэнгена — не прысуд адпачынку. Рэдактарка Visa Flow раіць прыгледзецца да краін Азіі — Тайланда, Шры-Ланкі, В'етнама. Разлічвайце, што тур у Тайланд будзе каштаваць вам каля 1,3 тыс. еўра, Шры-Ланка абыдзецца крыху даражэй — 1,4 тыс. еўра, а самым дарагім з гэтых варыянтаў будзе В'етнам — 1,5-1,7 тыс. еўра.

З непрыемнага — працяглы пералёт, у паветры давядзецца правесці 5-8 гадзін, а значыць, не ўсе вандроўнікі з дзецьмі захочуць скарыстацца такой опцыяй. Затое па цэнах такія туры даволі даступныя.

— Я б яшчэ зрабіла акцэнт на новым кірунку — гэта Аман. Там пакуль няма вялікай колькасці турыстаў, бо гэта новы напрамак для многіх. Цэны прымальныя: гэта значыць, па цане Егіпта можна атрымаць добры адпачынак з высокім узроўнем камфорту.

А яшчэ — Дубай (можна адпачыць за 1 тыс. еўра). Туды беларусы могуць паляцець прамым рэйсам. Цяпер адпачыць у Дубаі каштуе прыкладна столькі ж, колькі ў Турцыі ці Егіпце, але сэрвіс там нашмат лепшы.

Адзіны нюанс — Дубай не падыдзе для тых, хто хоча менавіта адпачынак на моры або акіяне, бо тамтэйшы праліў створаны штучна. Так, у Эміратах летам горача, тэмпература даходзіць да 40-50 градусаў, але летам усюды горача, калі казаць пра паўднёвыя краіны. І ў Егіпце будзе горача.

Больш-менш — у Турцыі (каля 1,2 тыс. еўра), і яна дагэтуль застаецца адным з самых папулярных кірункаў. Але, мне здаецца, гэтая краіна робіцца ўжо досыць дарагой праз колькасць людзей, якія туды едуць і выкарыстоўваюць яе як перасадачны хаб.

Можна разгледзець адпачынак на Паўднёвым Кіпры. Тэмпература там будзе прыкладна як у Дубаі, але па цэнах Дубай будзе таннейшы.

А калі вельмі хочацца ў Еўропу?

Нават калі ў вас няма шэнгенскай візы, гэта не значыць, што на адпачынку ў Еўропе гэтым летам трэба ставіць крыж.

Іспанія якраз раздала даты для падачы на візу ў красавіку. Разглядаюць дакументы там прыкладна месяц, але цалкам можна паспець зрабіць візу да лета. Яшчэ можна разлічваць на візу ад Грэцыі і Балгарыі.

Але калі вы проста хочаце шэнген, а не адпачынак у Грэцыі і Балгарыі, гэтыя краіны могуць вас расчараваць. Калі ваш тур быў фэйкавым, то візу могуць ануляваць. Але калі вы праўда хочаце адпачыць у адной з гэтых краін — падавайцеся смела.

З'ехаць гэтым летам на адпачынак у Еўропу змогуць і тыя, хто загадзя (за год!) паклапаціўся пра візу. Калі мінулай вясной мы казалі вам, што час чакання ў чарзе па нямецкую візу — цэлы год, запісвацца туды здавалася вар'яцтвам. Але вось ужо падыходзіць чарга тых, хто зрабіў гэта. Гэтыя беларусы могуць выбіраць любы еўрапейскі кірунак для адпачынку. Падобная сітуацыя — з італьянскай амбасадай.

— Але так, сітуацыя з візамі складаная. Месцаў стала крышачку менш, а ахвочых — толькі больш. І я не магу даць суцяшальны прагноз, не думаю, што найбліжэйшым часам атрымаць візу будзе прасцей.

Колькі каштуе шэнген (і колькі трэба мець у кішэні)?

Цэны за афармленне візы стартуюць ад 100-150 еўра і даходзяць да 1-3 тыс. еўра за візу. Усё залежыць ад таго, якую візу чалавек спрабуе адкрыць. Плюс у вас павінны быць грошы на рахунку. Анастасія раіць паказваць у выпісцы з карт-рахунку хоць бы 1,5 тыс. еўра. У цэлым правіла такое: чым больш грошай ляжыць у вас на рахунку, тым лепш.

У топе самых лаяльных да беларусаў краін, якія шчодра выдаюць візы, застаюцца Італія, Францыя і Германія. І таму запісацца ў іх амбасады і візавыя цэнтры вельмі складана (як з Італіяй і Францыяй) або час чакання візы жахліва доўгі (як у выпадку з Германіяй).

Стабільна выдае беларусам візы і Іспанія — калі вы старанна збераце правільны пакет дакументаў і пакажаце дастатковую колькасць грошай на рахунку.

Працягвае выдаваць шэнген беларусам і Венгрыя, асабліва калі ў вас добрая візавая гісторыя. Прасцей за ўсё купіць тур у Венгрыю і атрымаць візу ў пакеце. Але, як і Грэцыя з Балгарыяй, Венгрыя патрабуе ў абмен на візу абавязковага візіту ў госці.

— Консульствы правяраюць, ці не адмянілі вы бронь гатэля. І калі вы яе адмянілі, то яны адмяняюць і вашу візу. Балгарыя яшчэ напіша вам ліст, паведаміць, а Грэцыя, напрыклад, анулюе візу моўчкі.

І чалавек часам толькі на мяжы можа даведацца, што ён нікуды не едзе.

Нягледзячы на ўсе гэтыя складанасці з адкрыццём візы, Анастасія кажа, што ад Еўропы беларусы не адмаўляюцца. Так, паляцець у Аман прасцей — але хочацца з'ездзіць у Еўропу. І людзі працягваюць падаваць дакументы на адкрыццё візы і гадзінамі стаяць на мяжы.

— Мяркуючы з таго, як забітыя аўтобусы і якія чэргі на мяжы, зразумела, што людзі едуць у Еўропу. Так, многія едуць, каб сустрэцца з блізкімі — але многія едуць і проста на адпачынак. І думаю, летам ажыятаж будзе такі ж высокі.

Чаму беларусы гатовыя пераплачваць за візу, але адпачываць у Еўропе?

Бо як толькі ты перасякаеш мяжу, праблемы заканчваюцца. Пералёты і жыллё — таннейшыя, выбар напрамкаў — шырэйшы. Прыехаўшы ў аэрапорт Варшавы, ты можаш ляцець хоць у Грэцыю, хоць у Іспанію ці Італію.

— Можна знайсці гатэлі па прымальнай цане нават у сезон. Плюс танныя пералёты лаўкостарамі. Вядома, у сезон цэны на квіткі вышэйшыя за знакамітыя дваццаць еўра, але бываюць і распродажы, а многія купляюць квіткі загадзя.

Цяпер сярод беларусаў папулярным стаў адпачынак на астравах Мадэйра і Тэнэрыфэ. На Мадэйру якраз запусцілі прамыя рэйсы з Польшчы. І, вядома, гэта танней, чым пакетны тур.

Іспанія / unsplash

Мы спыталі ў Анастасіі, які варыянт адпачынку яна параіла б сябрам — пакет "пад ключ" ва ўмоўны Аман або Арабскія Эміраты альбо самастойнае падарожжа лаўкостам на Мадэйру?

— Усё залежыць ад запыту. Калі гэта вандроўнікі без дзяцей, я б прапанавала адкрыць візу і паляцець на Мадэйру. Калі гэта сям'я з дзецьмі, то, вядома, пакетны тур для іх быў бы нашмат камфортнейшы. Бо, каб трапіць у варшаўскі аэрапорт, трэба будзе мінімум 10 гадзін правесці на мяжы — і потым яшчэ 5 гадзін ляцець да Мадэйры.