Ціханоўская хоча ўвесці дэмакратычную Беларусь у праграмы Усходняга партнёрства

Еўрасаюзу варта паказаць беларусам, што Еўропа з'яўляецца альтэрнатывай "рускаму свету", а таксама ўключыць дэмакратычную Беларусь у праграмы Усходняга партнёрства. Пра гэта заявіла Святлана Ціханоўская ў сваім выступе перад міністрамі замежных спраў Еўрасаюза 26 студзеня ў Бруселі.

Таксама яна заклікала працягнуць палітыку ізаляцыі Аляксандра Лукашэнкі і адначасова "падтрымаць простых беларусаў". Пра гэта "Позірку" расказаў галоўны дарадца лідаркі беларускіх дэмакратычных сіл Франак Вячорка.

Паводле яго, сустрэча адбылася па запрашэнні вярхоўнага прадстаўніка ЕС па замежных справах і палітыцы бяспекі Каі Калас. У  ёй таксама ўдзельнічала камісар па пытаннях пашырэння ЕС Марта Кос. Падчас сустрэчы абмяркоўваліся непрызнанне "бязвыбараў" і Лукашэнкі, мірныя перамовы па Украіне, візавыя і легалізацыйныя пытанні, а таксама падтрымка грамадзянскай супольнасці і дэмакратычных сіл Беларусі.

Гаворачы пра магчымасць мірных перамоваў па Украіне, Ціханоўская заклікала еўрапейскіх дыпламатаў дамагацца вываду расійскіх войскаў з Беларусі і далейшага неўмяшання Крамля ва ўнутраныя справы краіны. Яна падкрэсліла, што Лукашэнка прадстаўляе расійскія, а не беларускія інтарэсы.

Таксама лідарка беларускіх дэмсілаў заклікала прыкласці ўсе намаганні для вызвалення палітвязняў і "ўзмацніць ціск і санкцыі з патрабаваннем спынення рэпрэсій".