Францыя склікае другую сустрэчу для абмеркавання Украіны і бяспекі ў Еўропе

Францыя склікае другую сустрэчу для абмеркавання Украіны і бяспекі ў Еўропе. Мяркуецца, што яна пройдзе ў сераду. Першая сустрэча прайшла ў панядзелак. На гэты раз запрошаны і прадстаўнікі тых краін NATO, якіх на ёй не было, паведамляе Reuters.

Сярод запрошаных краін згадваюцца Канада, Нарвегія, краіны Балтыі, Швецыя, Фінляндыя, Румынія, Чэхія, Грэцыя, Бельгія.

На экстраным саміце ў Парыжы 17 лютага лідары ЕС, NATO, Францыі, Германіі, Вялікабрытаніі, Італіі, Іспаніі, Даніі, Польшчы, Нідэрландаў абмеркавалі павелічэнне выдаткаў на абарону і гарантыі бяспекі Украіны. Ён быў сабраны напярэдадні перамоваў ЗША і Расіі ў Саудаўскай Аравіі, якія прайшлі ў аўторак. Украіна і ЕС на іх не былі запрошаны. Украінскі прэзідэнт Уладзімір Зяленскі крытычна выказаўся пра перамовы ў Саудаўскай Аравіі і перанёс свой візіт у гэтую краіну.

"Еўрапейскія лідары разрываюцца паміж неабходнасцю ў тэрміновым парадку павялічыць выдаткі на абарону і сціснутымі фінансавымі ўмовамі", — адзначае Reuters.