"Гродна-Азот" будуе склад двухвокісу вугляроду. Эколагі абураюцца

30/01/2024 - 16:50

Эколагі выявілі масу парушэнняў / azot.by

Некалькі тыдняў таму ў Гродне завяршылася грамадскае абмеркаванне з нагоды ацэнкі ўздзеяння на навакольнае асяроддзе (АУНА) новага аб'екта прадпрыемства "Гродна Азот".
На сайце мясцовага выканкама апублікавалі справаздачу па АУНА, якая праводзіцца арганізацыяй ААТ "ГІАП".

Яго падрабязна вывучылі эксперты экалагічнай арганізацыі ЭКАДОМ і знайшлі нямала парушэнняў датычна санітарна-ахоўнай зоны, забруджвання паветра і шумавога ўздзеяння.

Еўрарадыё пераказвае матэрыял экаэкспертаў.

Санітарна-ахоўная зона

Будаўніцтва прадугледжвае ўзвядзенне вытворчага корпуса, склада вадкага двухвокісу вугляроду, трансфарматарнай падстанцыі на тэрыторыі прадпрыемства ААТ "Гродна Азот".

Першае, на што звяртаюць увагу эксперты — знаходжанне жылых забудоў у межах санітарна-ахоўнай зоны, якая складае 1750 метраў на заходнім, паўночна-заходнім і паўднёва-заходнім напрамках, а таксама 2000 метраў па ўсіх астатніх.

Паводле справаздачы аб АУНА бліжэйшая жылая забудова размешчаецца на адлегласці 1500 метраў. Аднак, вывучыўшы кадастравую карту, эксперты ЭКАДОМ выявілі на адлегласці ў 1000 метраў у паўночным кірунку населены пункт Вялікая Капліца, на адлегласці 1480 метраў у паўднёва-заходнім кірунку — дзіцячы дом, на адлегласці 150 метраў — садовае таварыства "Хімік-Азот". А ў заходнім напрамку ўсяго ў 164 метрах ад прампляцоўкі знаходзіцца адкрытае спартовае збудаванне.

— Знаходжанне жылой забудовы, садовага таварыства, дзіцячага дома і адкрытых фізкультурна-спартовых збудаванняў у мяжы санітарна-ахоўнай зоны з'яўляецца парушэннем санітарных нормаў, але гэта не бянтэжыць ні распрацоўніка справаздачы аб АУНА, ні мясцовыя органы санітарна-эпідэміялагічнага нагляду, — піша ЭКАДОМ.

Забруджванне паветра

Звесткі па замерах узроўню забруджвання паветра таксама выклікалі ў экспертаў нямала пытанняў.
Напрыклад, у 2021 годзе, паводле дадзеных справаздачы аб АУНА, пры адборы пробаў на мяжы санітарна-ахоўнай зоны ў заходнім і паўночным напрамках (2000 метраў), канцэнтрацыя аміяку ў паветры складала 188,7 мкг/м3 і 197,3 мкг/м3 адпаведна, у той час як максімальнае значэнне не павінна перавышаць 200 мкг/м3. І гэта пры тым, што ў паўночным кірунку на адлегласці 1000 метраў размешчаны населены пункт Вялікая Капліца.

Акрамя гэтага, эколагі высветлілі, што ў паўночна-ўсходнім кірунку на адлегласці 1650 метраў знаходзіцца населены пункт Путрышкі, дзе ўзровень аміяку ў паветры склаў 65,9 мкг/м3. Адкуль узяліся такія лічбы, незразумела! Улічваючы, што на адлегласці 2000 метраў узровень дасягае практычна 200 мкг/м3.

Шумавое ўздзеянне

Паводле звестак ЭКАДОМ, распрацоўнікі справаздачы аб АУНА зрабілі выснову, што ўзроўні гуку не перавышаюць гранічна дапушчальны ўзровень на мяжы санітарна-ахоўнай зоны і на жылой забудове. Пры гэтым разлік шуму не выконваўся. Чаму не выканалі разлік з улікам наяўных і праектаваных крыніц шуму, распрацоўнік не патлумачыў.