ХАМАС вёў шматгадовую кампанію падману Ізраіля — Reuters

ХАМАС вёў шматгадовую кампанію падману Ізраіля, каб заспець яго знянацку. Пра гэта паведамляе Reuters са спасылкай на крыніцу, блізкую да тэрарыстычнай арганізацыі. ХАМАС зрабіў усё магчымае, каб у Тэль-Авіве думалі, што ён не жадае ўзброенага канфлікту і што яго можна супакоіць эканамічнымі стымуламі (напрыклад, доступам да працоўных месцаў за мяжой) для падтрымання адноснага спакою.

Асабліва актыўна згаданая кампанія вялася ў апошнія месяцы. "ХАМАС стварыў у Ізраіля ўражанне, што ён не гатовы да бою", — паведаміла крыніца агенцтву. А тым часам ішла актыўная падрыхтоўка груп баевікоў, часта ва ўсіх навідавоку. У рамках сваёй падрыхтоўкі ХАМАС нават пабудаваў макет ізраільскага паселішча для навучання.

Крыніца ў ізраільскіх службах бяспекі пацвердзіла Reuters гэтую інфармацыю.

Напад ХАМАС з сектара Газа на Ізраіль 7 кастрычніка лічыцца найгоршым правалам у абароне краіны за апошнія 50 гадоў. З таго часу ахвярамі тэрарыстаў сталі больш за 800 чалавек, больш за 2 тысячы параненыя. 

Ізраіль працягвае наносіць удары па аб'ектах ХАМАС у сектары Газа. Чакаецца, што ў найбліжэйшыя дні там пачнецца наземная аперацыя.