Палітычны прытулак у Польшчы за тры гады атрымалі толькі чатыры беларусы
Вольга Дабравольская / Еўрарадыё
Толькі чатыры беларусы за тры гады атрымалі палітычны прытулак у Польшчы. Пра гэта паведаміла кіраўніца дэпартамента прававой абароны Цэнтра беларускай салідарнасці Вольга Дабравольская.
“Не варта блытаць гэта з міжнароднай абаронай. Дазвол на палітычны прытулак выдаецца міністрам замежных спраў у інтарэсах польскай дзяржавы. Напрыклад, калі чалавек, які звярнуўся, — гэта навуковец, актывіст, палітык... Увогуле, тыя людзі, якія могуць быць у Польшчы карысныя. Палітычны прытулак не дае чалавеку ні сацыяльнай, ні медыцынскай падтрымкі, затое ён можа адразу падаваць заяву на пастаянны від на жыхарства", — тлумачыць Дабравольская.
У ЦБС не ведаюць, колькі беларусаў спрабавалі падавацца на палітычны прытулак, але юрысты рэкамендуюць рабіць такі крок.
"Часцей за ўсё беларусы, якія звяртаюцца да нас, проста просяць абароны, не ўдакладняючы якой", — кажуць у ЦБС.
