Пасля цюбінгавай у Гродне закрылі і лыжную трасу
Лыжная траса ў гродзенскіх Каробчыцах / grodnonews.by
У гарналыжным комплексе ў гродзенскіх Каробчыцах закрылі і лыжную трасу. Раней там закрылі абсталяваную цюбінгавую трасу.
Трасу для лыж і сноўбордаў адкрылі 21 лютага, а ўжо 22-га яна зачынілася, заўважыла выданне hrodna.life. У Інстаграм-акаўнце комплексу "Каробчыцкі Алімп" напісалі, што паламаўся пад'ёмнік. А без пад'ёмніка, як выявілася, катацца немагчыма. Пра аднаўленне працы адміністрацыя абяцала паведаміць асобна, але пакуль што такіх абвестак няма.
Каментатары ў сацсетках іранізуюць: "Графік працы 2 праз 363? І так з году ў год".
Раней паведамлялася пра закрыццё абсталяванай цюбінгавай трасы ў гэтым жа комплексе. Яна паспела папрацаваць менш за тыдзень. На другі дзень працы на трасе здарыўся няшчасны выпадак: пры сутыкненні цюбінгаў атрымала траўмы 10-гадовая дзяўчынка. Следчы камітэт пачаў праверку. А праз некалькі дзён трасу закрылі без тлумачэння прычын.
