СК правёў ператрус у бацькоў бягухі Крысціны Ціманоўскай
Крысціна Ціманоўская
У кватэры бацькоў Крысціны Ціманоўскай адбыўся ператрус. Правёў яго Следчы камітэт, напісала лёгкаатлетка ў сваім акаўнце ў Інстаграме.
"У мяне забралі дом, а цяпер дабраліся да маёй сям'і, звычайнай правінцыйнай сям'і, дзе тата ўсё жыццё працаваў пажарным, а мама — супрацоўніцай банка", — піша бягуха.
Паводле Ціманоўскай, за апошні год яе бацька перанёс інсульт (атрымаў інваліднасць), а маці хварэла на рак.
Лёгкаатлетка запрашае прадстаўнікоў Следчага камітэта прыехаць да яе ў новы дом для ператрусаў і гутарак.
На Алімпіядзе ў Токіа ў 2021 годзе Ціманоўская рэзка раскрытыкавала кіраўніцтва зборнай, якое паставіла яе выступаць замест спартовак, не дапушчаных да спаборніцтваў. Праз два дні спартовыя чыноўнікі паспрабавалі прымусова вывезці бягуху ў Беларусь, але яна пасля гучнага пратэсту засталася ў Японіі пад наглядам паліцыі. Адтуль Ціманоўская адправілася ў Польшчу, дзе ў жніўні 2022 года атрымала грамадзянства.
У красавіку 2024-га стала вядома, што Ціманоўская будзе ўдзельнічаць у выбарах у Каардынацыйную Раду. Яна ўваходзіць у спіс "Закон і правапарадак", які ўзначальвае Аляксандр Азараў. На ўсіх кандыдатаў у КР у Беларусі пачалі крымінальную справу.
