У Беларусі заканчваецца прэпарат для ўсыплення. Пасля аналага жывёлы... ажываюць

15/05/2024 - 15:15

"Можа гэта жахі нейкія?" — кажуць супрацоўнікі адной з ветклінік

"Можа гэта жахі нейкія?" — кажуць супрацоўнікі адной з ветклінік / pixabay

Чытачы Еўрарадыё расказалі, што праз санкцыі ў Беларусь амаль перасталі завозіць прэпарат для эўтаназіі жывёл. Верагодней за ўсё гаворка ідзе пра нідэрландскі прэпарат Т-61, які раней часта выкарыстоўвалі ў клініках.

"Цяпер многія клінікі перайшлі на расійскія прэпараты, але яны настолькі кепскія, што сэрца жывёлы можа праз 20 хвілін пасля смерці зноў пачаць біцца", — піша чытач Еўрарадыё.

Эўтаназія гадаванца і так няпростае рашэнне. Ува многіх клініках гаспадарам дазваляюць прысутнічаць падчас працэдуры, але часта з агаворкай — гэта непажадана, бо эмацыйна цяжка. І тым больш страшна ўявіць сітуацыю, калі гадаванец "ажывае" пасля ўсыплення ад няякаснага прэпарата.

Мы патэлефанавалі ў некалькі ветэрынарных клінік Беларусі, каб даведацца, якія прэпараты зараз выкарыстоўваюцца для эўтаназіі.

Рэшткі нідэрландскага прэпарата?

У трох з пяці клінік нам прапанавалі Т-61. Гэта зарэгістраваны ў Беларусі нідэрландскі прэпарат, яго выкарыстоўваюць шмат гадоў. Сусветнае таварыства абароны жывёл абавязвае выкарыстоўваць яго толькі ў камплекце са снатворным. Калі гэтым этапам пагрэбаваць, то гадаванец памрэ ў пакутах.

У беларускіх зоаабаронцаў даўно былі пытанні да гэтага прэпарата. З большага яны былі звязаныя з тым, што ён выкарыстоўваўся ў дзяржаўных "усыпалках". А даверу да тых, хто займаецца адловам жывёл, у зоаабаронцаў няма — праверыць, ці ўвялі кошцы ці сабаку наркоз перад тым, як увесці Т-61, немагчыма.

У 2015 годзе зоаабаронцы нават спрабавалі накіраваць петыцыю дэпутатам з просьбай забараніць выкарыстоўванне гэтага прэпарата ў Беларусі.

"Хочаце зразумець, што адчувае кошка або сабака пасля ін'екцыі ў сэрца Т-61? Уявіце, што ваша цела цалкам спаралізавала (вы не можаце ні ўдыхнуць, ні выдыхнуць, ні паварушыцца), а мозг жыве", — пісалі аўтары петыцыі.

Беларусь не адзіная краіна, дзе для эўтаназіі ўжываюць гэты прэпарат. Дазволены ён для ўсыплення хатніх жывёл, напрыклад, у Канадзе. Але там таксама робіцца важная агаворка: недапушчальна ўжываць Т-61 у дачыненні да жывёл, якія знаходзяцца ў свядомасці. А таварыства абароны жывёл ЗША проста адносіць усыпленне з дапамогай гэтага прэпарата да негуманных метадаў эўтаназіі.

Калі вядзецца пра эўтаназіі хатняй жывёлы ў ветклініцы, то тут наркозам грэбаваць не будуць. І ўсё ж уладальнікам жывёл рэкамендуюць застацца побач са сваім гадаванцам, каб праверыць, што перад эўтаназіяй яго пагрузілі ў глыбокі сон.

Верагодней за ўсё якраз нідэрландскі Т-61 знік у Беларусі праз санкцыі. А там, дзе яго яшчэ выкарыстоўваюць, проста дастаюць са старых запасаў.

"Можа гэта жахі нейкія?"

Яшчэ ў дзвюх клініках нам прапанавалі ўсыпіць сабаку прэпаратам "Анестафол". На гэты прэпарат на сайце дабрачыннага зоаабарончага таварыства "Эгіда" адгукаліся станоўча. Там са спасылкай на лекара-ветэрынара ў 2021 годзе пісалі, што ў нас гэта адзіны гуманны спосаб усыпіць гадаванца.

"Анестафол вырабляецца ў Беларусі на замежным вытворчым унітарным прадпрыемстве "Вік — здароўе жывёл". Смерць жывёлы адбываецца ад прымянення дозы анестэтыка, якая у некалькі разоў перавышае наркатычную, што дазваляе казаць аб максімальнай гуманнасці пры правядзенні эўтаназіі. Спыненне сардэчнай і дыхальнай дзейнасці адбываецца на працягу 30-60 секунд, адсутнічаюць сутаргавыя скарачэнні цягліц", — расказваў "Эгідзе" лекар-ветэрынар.

Але ў клініцы нам сказалі, што "Анестафол", які яны выкарыстоўваюць, выраблены ў Расіі. Мы падзяліліся сваімі асцярогамі і наўпрост спыталі, ці можа жывёла "прачнуцца" пасля клінічнай смерці ад расійскага прэпарата.

— Гэта ў нашай клініцы праводзілі эўтаназію?! — здзівілася суразмоўніца на рэсепшэне ветклінікі, калі мы пераказалі ёй гісторыю нашага чытача.

— Не-не, не ў вашай.

— Глядзіце, як праходзіць працэдура. Спачатку жывёла падпадае пад наркоз, а ўжо потым уводзіцца прэпарат. Ніякіх болевых адчуванняў пры гэтай маніпуляцыі гадаванец не мае. Ён проста засынае і не прачынаецца. Лекар пацвярджае клінічную смерць. Таму такія выпадкі, як той, што вы апісалі, проста немагчымыя. Можа гэта жахі нейкія?

— Хацелася б. Працэдура і так не з прыемных.

— Так, разумею. Глядзіце, раней клінікі выкарыстоўвалі прэпарат Т-61, але цяпер яго ў Беларусь не завозяць.

— О, а мне ў некалькіх клініках яго прапанавалі. Але я пра яго столькі жахаў прачытала, што вырашыла пашукаць штосьці яшчэ.

— Дакладна не завозяць. Можа ў іх рэшткі нейкія?

"Падбіраецца індывідуальна ў залежнасці ад вагі"

Яшчэ ў адной клініцы нам падрабязна расказалі, як праходзіць працэс эўтаназіі, але прэпарат, з дапамогай якога жывёле спыняюць сэрца, так і не назвалі.

"Прэпарат падбіраецца індывідуальна — у залежнасці ад віду і вагі жывёлы", — напісалі нам праз тэлеграм-бот супрацоўнікі клінікі.

Мы некалькі разоў папрасілі назваць прэпарат, але адказу так і не атрымалі.