У ініцыятыўную групу Статкевіча запісаліся больш за 1500 чалавек

У склад ініцыятыўнай групы палітвязня Мікалая Статкевіча ўвайшло больш за 1500 чалавек. Пра гэта інфармуе БелаПАН са спасылкай на жонку палітыка Марыну Адамовіч.

14 ліпеня ў Мінску прайшло агульнае пасяджэнне прадстаўнікоў структур, якія ўдзельнічаюць у кампаніі па вылучэнні Статкевіча кандыдатам у прэзідэнты. На пасяджэнні вырашылі падаваць дакументы аб рэгістрацыі ініцыятыўнай групы ў Цэнтрвыбаркам 16 ліпеня. Заўтра фармаванне інцыятыўнай групы яшчэ будзе працягвацца.

Па словах Адамовіч, кожная са структураў, якія ўваходзяць у аргкамітэт па вылучэнні Статкевіча, прыцягнула ў ініцыятыўную групу не менш за 200 чалавек.

У склад адзінага аргкамітэта па вылучэнні палітвязня Мікалая Статкевіча ўвайшлі прадстаўнікі аргкамітэта Беларускай сацыял-дэмакратычнай партыі (Народная Грамада), Беларускага прафсаюза работнікаў радыёэлектроннай прамысловасці, Аб'яднанай грамадзянскай партыі, аргкамітэта партыі "Беларуская хрысціянская дэмакратыя", зарэгістраванага ў Чэхіі аб'яднання "Малады фронт", руху "За дзяржаўнасць і незалежнасць Беларусі", а таксама руху салідарнасці "Разам".

Фота — statkevich.org