У Лідзе знік памятны камень, усталяваны на магіле ксяндза Адама Фалькоўскага

У Лідзе знік памятны камень, усталяваны на сімвалічнай магіле ксяндза Адама Фалькоўскага. У 1863-м ён быў расстраляны рускімі войскамі ў Лідзе за актыўную падтрымку паўстання Кастуся Каліноўскага. Як піша glosznadniemna.pl, камень знік напярэдадні 162-й гадавіны пачатку паўстання (дакладна вядома, што ён быў там яшчэ восенню 2024-га). Выданне называе гэта "блюзнерскім учынкам".

Вандалізм на месцы пахавання Фалькоўскага — з'ява не новая: спачатку камяні вакол магілы раскідвала царская паліцыя, у 1940 годзе крыж знішчылі савецкія ўлады. З тымі крыжамі, што ставілі мясцовыя жыхары ў 1990-я ў гарадскім парку, упарта змагаліся чыноўнікі. Толькі ў 2010-м з дазволу мясцовых уладаў крыж замянілі на камень. Але пазней ён зноў аказаўся "ідэалагічна няправільным". У пачатку 2024 года стала вядома, што з камня знік герб вызваленчага паўстання: "Пагоню", польскага белага арла і анёла зацерлі невядомыя.

Рэжым Лукашэнкі ў апошнія гады актыўна змагаецца з помнікамі. У 2023-м адбыўся дэмантаж помніка паэтцы Ларысе Геніюш каля праваслаўнай царквы ў Зэльве. У тым жа годзе ў Мінску знішчылі крыж, усталяваны каля мінскага касцёла святога Роха ў памяць забітага нацыстамі беларускага ксяндза, грамадскага дзеяча і палітыка Вінцэнта Гадлеўскага. Таксама на Гродзеншчыне былі зруйнаваныя помнікі і пахаванні, звязаныя з польскай Арміяй Краёвай.