У МЗС Малдовы пракаментавалі сітуацыю з аўтобусам з дзецьмі
МЗС Малдовы, ілюстрацыйнае фота / Sputnik
У МЗС Малдовы пракаментавалі сітуацыю з аўтобусам з дзіцячым хорам, які не можа выехаць з Беларусі, піша newsmaker.md.
У ведамстве кажуць, што Літва не прапусціла аўтобус праз адсутнасць ліцэнзіі.
"Амбасада Малдовы ў Вільні знаходзіцца ў пастаянным кантакце з памежнымі ўладамі Літвы, каб спрыяць хуткаму ўрэгуляванню сітуацыі і хутчэйшаму атрыманню неабходнага дазволу", — заяўляюць у ведамстве. Малдоўскія дыпламаты назвалі бяспеку суграмадзян сваёй галоўнай задачай.
Як распавядала Еўрарадыё, больш за суткі з Беларусі не можа выехаць аўтобус з малдоўскім дзіцячым хорам "Рапсодыя". У Мінску ён удзельнічаў у дзіцячым тэатральным форуме "Крокі", дзе заваяваў Гран-пры.
Аўтобус спярша спрабаваў перасячы беларуска-польскую мяжу, але пасля беспаспяховай спробы адправіўся на мяжу з Літвой. Аднак і там яму не ўдалося выехаць з тэрыторыі Беларусі.
