У Вільні спадзяюцца, што на перапахаванне Каліноўскага прыедзе прэм'ер Румас
![У Вільні спадзяюцца, што на перапахаванне Каліноўскага прыедзе прэм'ер Румас](/sites/default/files/styles/gallery_main/public/2023-08/4f1ef403071211b3e86ac9b39dfc11e6.jpg.webp?itok=UTt_dIYC)
У Вільні спадзяюцца, што на перапахаванне парэшткаў паўстанцаў 1863-1864 гадоў, у тым ліку нацыянальнага героя Беларусі Кастуся Каліноўскага ў складзе беларускай дэлегацыі прыедзе прэм'ер-міністр Сяргей Румас. Цырымонія адбудзецца ў літоўскай сталіцы ў лістападзе. Паўстанцы будуць урачыста перапахаваныя на віленскіх могілках Росы. Надпісы на іх магілах будуць і па-беларуску.
Як інфармуе Delfi, запрашэнне на ўрачыстую цырымонію атрымаў прэзідэнт Польшчы Анджэй Дуда, запрошаная і ўрадавая дэлегацыя Беларусі. Што да Латвіі і Украіны, што яны будуць прадстаўленыя на больш нізкім узроўні. Дакладная дата стане вядомая пазней. Яна залежыць ад падрыхтоўчых працаў, якія праводзяцца ў капліцы на могілках Росы (там адбудзецца перапахаванне).
Парэшткі паўстанцаў былі знойдзены на гары Гедыміна ў Вільні, дзе іх тайна пахавалі расійскія ўлады пасля пакарання смерцю. Асобу кіраўніка вызваленчага паўстання ў Беларусі і Літве Кастуся Каліноўскага ідэнтыфікавалі на 95%. Каб зняць усе сумненні, у Свіслачы праводзіліся раскопкі на месцы магілы Віктара Каліноўскага, брата Кастуся.