Беларускі дыстрыб'ютар Liqui Moly разарваў кантракт з брэндам
Дыстрыб'ютар Liqui Moly ў Беларусі разарваў кантракт з брэндам. Беларуская кампанія незадаволеная "палітычным рашэннем" брэнда адмовіць у падтрымцы чэмпіянату свету па хакеі ў Мінску.
"Гэтая палітызаваная заява камерцыйнай арганізацыі робіць немагчымым наша далейшае супрацоўніцтва з гэтым пастаўшчыком па цалкам відавочных для ўсіх прычынах", — гаворыцца ў заяве.
Для Liqui Moly гэта наўрад ці будзе значнай стратай, бо рынак Беларусі невялікі. Цікава, што дыстрыбʼютарам выступае фірма "ОБК Групп". Яе звязваюць з зяцем былога прэмʼера Беларусі Сяргея Сідорскага.
Як паведамлялася раней, Liqui Moly адмовілася спансіраваць чэмпіянат свету па хакеі следам за Nivea, Škoda і Tissot. Нямецкая кампанія па вытворчасці аўтамабільных алеяў патлумачыла сваё рашэнне цяперашняй сітуацыяй у Беларусі, а таксама палітыкай урада, абыходжаннем з дэманстрантамі і відавочнымі парушэннямі правоў чалавека.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
