Карэспандэнтка Еўрарадыё патэлефанавала ў адзін з інтэрнатаў БелАЗ і назвалася арандатаркай, якой няма куды прыстроіць ката. Наша журналістка спытала, што цяпер рабіць з гадаванцам.
— Па правілах унутранага распарадку і па рашэнні выканкама ў нас забараняецца ўтрыманне жывёл, — сказалі ў інтэрнаце.
— Але ж раней трымалі…
— Ну, што значыць, трымалі... Трымаць нельга, і пра гэта вы мусілі ведаць. Вас пра гэта інфармавалі, калі вы засяляліся, — кажуць у інтэрнаце. — Вы ж разумееце, што і "трыманне" рознае бывае. Калі праблема ўзнікла, значыць, аднекуль выплыла, раз пытанне паўстала так востра. Бо хтосьці акуратна трымае, а хтосьці не.
Як паводле закона?
На якія юрыдычныя наступствы могуць разлічваць жыльцы інтэрната ў такой сітуацыі? На гэтае пытанне ананімна адказала беларуская юрыстка Аксана [імя змененае], якая часова пражывае ў Польшчы.
— Правілы ўтрымання хатніх жывёл у Беларусі рэгулююцца пастановай Савета Міністраў. Але пра утрыманне жывёл у інтэрнатах у гэтым дакуменце нічога не гаворыцца, таму першы дакумент, які вам трэба будзе вывучыць — правілы распарадку вашага інтэрната, — кажа Аксана.
Калі ў іх наўпрост не прапісваецца забарона на ўтрыманне жывёл, значыць, у вашым інтэрнаце дазваляецца іх трымаць. А калі забарона прапісваецца? Што рабіць?
— Забраць у вас хатняга гадаванца не маюць права, таму што вашыя каты, сабакі і хамякі — гэта вашая маёмасць, — падкрэслівае юрыст.
Але ці могуць вас выселіць з інтэрната, калі вы завялі ката ці сабаку, нягледзячы на выразна прапісаную ў правілах забарону?
— Так, могуць, — сцвярджае Аксана. — Але зрабіць гэта будзе няпроста — і працэс не будзе хуткім.
Глядзім у Пастанову аб інтэрнатах. Вас могуць выселіць з інтэрната, калі вы сістэматычна парушалі правілы ўнутранага распарадку і тым самым зрабілі "немагчымым для іншых пражыванне" ў адным інтэрнаце. Пры гэтым вас павінны былі папярэдзіць аб верагоднасці высялення, а вы на працягу каляндарнага года ўсё роўна дапускалі аналагічныя парушэнні.
— Гэта значыць адміністрацыя інтэрната павінна пісьмова папярэдзіць вас, што вы павінны прыбраць з памяшкання кошку або сабаку. Недастаткова павесіць на ўваходзе аб'яўку, у якой гаворыцца, што пражыванне з хатнімі гадаванцамі забараняецца. Факт парушэння мусіць быць зафіксаваны. Гэта значыць нейкая камісія мусіць засведчыць факт знаходжання хатняй жывёлы ў такім ці гэткім пакоі.
Але і тады высяленне будзе верагодным, калі ўтрыманне жывёлы робіць для іншых немагчымым пражыванне ў інтэрнаце. Калі іншыя не пярэчаць — усё ў парадку, — падкрэслівае юрыстка.
Колькі павінна быць гэтых "іншых"? Хутчэй за ўсё, аднаго суседа, якому будзе замінаць ваш гадаванец, дастаткова для таго, каб вас прасілі яго выселіць.
А калі вы адмовіцеся?
— Тады арганізацыя, на балансе якой знаходзіцца інтэрнат, павінна будзе падаць у суд. Будзе вельмі пацешна, калі БелАЗ падасць трыццаць іскаў аб высяленні людзей з хатнімі жывёламі. Будзе рэзанансная справа, — мяркуе наша суразмоўніца.
Дапусцім, БелАЗ падае ў суд на жыхароў інтэрната. Калі ўладальнікі хатніх жывёл прайграюць гэты суд, у якую суму ім абыдзецца ўвесь працэс?
— Хутчэй за ўсё іск будзе падавацца сіламі юрысконсульта БелАЗ, — разважае Аксана. — У такім выпадку наўрад ці да кампенсацыі будуць прад'яўляцца адвакацкія ганарары. Значыць, адказчыку трэба будзе аплаціць толькі дзяржпошліну. Хутчэй за ўсё, гэта будзе сума ў памеры 120 рублёў (мяркуючы па калькулятары дзяржпошліны на сайце Вярхоўнага суда). Гэта максімальная сума, якую могуць прад'явіць.
