Жыллё ў крэдыт падаражэе: як новыя стаўкі паўплываюць на рынак

Што тычыцца чаргавікоў, то пры куплі кватэры ў фізасобы стаўка складзе 15%, у юрыдычнай асобы (гаворка пра гатовыя новабудоўлі) — 14,5%. Да гэтага яна была адзінай для ўсіх — 12,5%.

Так, трохпакаёвая кватэра для тых, хто мае патрэбу ў паляпшэнні жыллёвых умоў, на вуліцы Убарэвіча каштуе 220 711 рублёў. Калі дадаць яшчэ 14,5%, атрымаецца 252 714 рублёў, а па ранейшай стаўцы ў 12,5% яна б каштавала 248 299 рублёў. 

Розніца — у тысячу долараў.

Павышэнне ставак будзе астуджаць рынак

Старшая навуковая супрацоўніца аналітычнага цэнтра Beroc Анастасія Лузгіна лічыць, што далейшае павышэнне ставак па крэдытах будзе астуджаць рынак (зніжэнне попыту на куплю жылля).

— Павышэнне ставак будзе астуджаць рынак, закранаючы як нерухомасць, так і спажывецкія тавары. Эксперты ў сферы рынку жылой нерухомасці кажуць, што ў апошнія гады ён пачынае рэагаваць, калі стаўкі па крэдытах больш за 18% — гэта ўжо можа непасрэдна адбіцца на актыўнасці куплі жылля.

Экспертка кажа, што Беларусбанк — не адзіны банк, які праводзіць такое павышэнне.

— Гэты рост ставак нельга назваць надта актыўным. Павышэнне хоць і невялікае, але яно ёсць. І гэтаму ёсць некалькі тлумачэнняў. З аднаго боку камерцыйна банкі могуць улічваць тое, пра што казаў Нацыянальны банк — трэба абмежаваць актыўнасць насельніцтва ў плане спажывецкага крэдытавання.

Другі момант, калі зірнуць на статыстыку па банках, то ў студзені стаўкі па новых дэпазітах у сярэднім былі вышэйшыя, чым стаўкі па крэдытах.

А калі павышаюцца стаўкі па дэпазітах, то, лагічна, што павышаюцца стаўкі і па крэдытах.

І трэці фактар — высокія стаўкі ў Расіі. У пэўнай ступені ператок капіталу можа быць. Таму беларускія банкі таксама ўлічваюць гэты фактар для прадпрыемстваў і насельніцтва.