“Кругавая парука”. Настаўнікаў абавязалі збіраць кампрамат на вучняў

Кожны настаўнік будзе несці адказнасць за характарыстыкі, якія даў.
Гэта будзе мець асаблівае значэнне, калі студэнт зладзіць падчас навучання нейкую акцыю. Адразу пачнуць капаць, хто гэта, дзе вучыўся, хто і якую характарыстыку на яго даў.

Я б дадаў, што ў нейкім сэнсе напісанне характарыстык — гэта яшчэ і інстытут фармавання кругавой парукі. Кожны мусіць адказваць за іншага.

Еўрарадыё: Такім чынам, працэдура будзе спрыяць укараненню адмоўнай селекцыі?

Андрэй Лаўрухін: Адмоўная селекцыя адбываецца ўжо 20 гадоў. Складанне характарыстык — гэта адзін з інструментаў, якія будуць ёй спрыяць.

Стаўлю сябе на месца настаўніка і думаю: ці зацікаўлены я, каб характарыстыка майго вучня была добрая? Раптам я памылюся? Дык… можа, даваць дрэнную? Мне падаецца, што скажэнні ў гэтай справе непазбежныя. Настаўнікі будуць спрабаваць абысці вострыя вуглы, каб пазбегнуць адказнасці. Будзе падвойная сацыяльная бухгалтэрыя. Людзі будуць яшчэ больш баяцца гаварыць праўду.

З’явяцца новыя складанасці — будзем гуляць у гульню, каб і вучням даць дарогу, і сябе не падставіць. Эзопава мова, якая будзе больш рабіць блытаніны, чым спрыяць негатыўнаму адбору.

Еўрарадыё: Адкуль такія прагнозы?

Андрэй Лаўрухін: У Беларусі няма ідэалогіі, а калі няма ідэалогіі, няма і вобразу ідэальнага сацыяльнага тыпу, іншымі словамі — няма прыкладу.

За савецкім часам быў маральны кодэкс камуніста — рабочы чалавек. Вобраз быў яскравы. У Беларусі такога вобразу няма. У Беларусі ўвогуле няма ніякага вобразу будучыні.

Сёння Лукашэнка кажа адно, заўтра — другое, паслязаўтра — трэцяе. Асоба капрызлівая, незразумела чаго яшчэ ад яе чакаць. Немагчыма знайсці крытэры ідэальнага сацыяльнага тыпу, да якога можна было б прымерацца, каб не памыліцца.

Акрамя таго, у характарыстыцы мусяць быць звесткі пра паводзіны выпускніка, дысцыплінарныя спагнанні, ужытыя да яго за апошні год да даты выдачы, правядзенне з ім індывідуальнай прафілактычнай работы і гэтак далей. Установа адукацыі мусіць выдаць дакумент цягам пяці каляндарных дзён пасля атрымання запыту.

А што, калі такіх запытаў будзе шмат?

Як за кароткі час зразумець ці ўспомніць якасці таго ці іншага вучня, сур’ёзна з ім паразмаўляць, зрабіць высновы і апісаць іх?

Як стала вядома Еўрарадыё, у некаторых мінскіх школах настаўнікі пачалі перастрахоўвацца. Каб пазнаёміцца, вучням прапаноўваюць запоўніць “Анкету па патрыятычным выхаванні”.

Пытанні "Як вы ставіцеся да рэлігіі?" і "Ці дапускаеце вы ўдзел у несанкцыянаваных мітынгах, дэманстрацыях?" пазначаныя як абавязковыя.