У Беларусі будуць выпускаць спецыялістаў па мармеладзе
Мядзведзь Падынгтан, найлепшы ў свеце эксперт па мармеладзе / unsplash
У Беларусі можна будзе вывучыцца на спецыяліста па пасціле і мармеладзе, расказала начальніца профільнага ўпраўлення Міністэрства адукацыі Аляксандра Пятрова.
"Спецыяльнасць гучыць вельмі смачна — вытворца мармеладна-пасцілачных вырабаў. Гэта спецыяльнасць для нашага выдатнага прадпрыемства "Чырвоны харчавік", якое знаходзіцца ў Бабруйску. І, адпаведна, падрыхтоўка адкрытая там", — патлумачыла Пятрова.
З'явяцца яшчэ некалькі новых спецыяльнасцяў, на якія можна будзе вывучыцца. Адна з іх таксама ўводзіцца для таго, каб забяспечыць кадрамі канкрэтнае прадпрыемства — "Керамін".
А яшчэ беларускія ўстановы прафесійна-тэхнічнай адукацыі будуць набіраць спецыялістаў для абслугоўвання эскалатараў.
"Мы бачым, што ў нас як у метро, так і ў іншых месцах, напрыклад, у гандлёвых цэнтрах, усталяваныя эскалатары. Таму наспела патрэба масавага выпуску такіх рабочых", — кажа Пятрова.
Прыёмная кампанія на ўзровень прафесійна-тэхнічнай адукацыі пачнецца 15 чэрвеня і скончыцца 23 жніўня. Прыёмная кампанія на ўзровень сярэдняй спецыяльнай адукацыі пачнецца ў 20-х чыслах ліпеня і скончыцца ў пачатку жніўня.
