Махляры прапануюць беларусам адкупіцца ад "крыміналкі за экстрэмізм"

Жыхары Беларусі сталі атрымліваць у сацсетках пагрозы ад невядомых: ім прапануюць адкупіцца ад "крымінальнай справы за экстрэмізм". Цана пытання — 20 еўра.

"Вашая актыўнасць у экстрэмісцкіх групах прыцягнула маю ўвагу. Вымушаны паведаміць, што ў вас могуць узнікнуць праблемы з законам. Канкрэтна ў вашым выпадку справа будзе распачатая паводле артыкула 361-4 КК РБ "садзейнічанне экстрэмісцкай дзейнасці". Я разумею, што такое пакаранне, як пяць гадоў турмы, не адпавядае цяжару вашай віны. Таму прапаную сваю дапамогу: усяго толькі за 20 еўра я дапамагу "забыцца" знойдзеную інфармацыю. Інструкцыя тут", — гаворыцца ў паведамленні ад імя нейкага Дзяніса.

Таксама аўтар допісу пагражае, што запісаў усю гісторыю актыўнасці акаўнта з 2020 года.

Як адзначаюць праваабаронцы, такія допісы атрымалі жыхары Магілёўскай, Віцебскай і Гродзенскай абласцей. Такія ж паведамленні атрымлівалі і беларусы ў Польшчы. 

Відавочна, што махляры спрабуюць скарыстацца палітычнай сітуацыяй у Беларусі, дзе з 2020 года працягваюцца жорсткія рэпрэсіі.

Пераходзіць па дасланых спасылках не рэкамендуецца.