Жыхарка Мазыра пералічыла аферыстам амаль 43 тысячы рублёў

У Мазыры 50-гадовая жанчына стала ахвярай аферыстаў, якія дзейнічалі паводле схемы падвойнага махлярства. У мэсанджары ёй патэлефанавалі адзін за адным нібыта супрацоўнікі банка і фінансавай міліцыі.

Пад падставай анулявання крэдытаў, аформленых на яе імя злачынцамі, махляры пераканалі яе ўзяць у тых жа банках аналагічныя пазыкі, а затым вывесці асабістыя зберажэнні на "бяспечны рахунак".

Злачынцы размаўлялі з мазыранкай па відэасувязі, запалохвалі і пагражалі крымінальнай адказнасцю ў выпадку разгалашэння службовай інфармацыі. Паддаўшыся ціску і пагрозам, жанчына пералічыла ім каля 43 000 рублёў.

Міліцыя ўзбудзіла крымінальную справу.

МУС звяртае ўвагу, што іх супрацоўнікі не камунікуюць з грамадзянамі праз мэсанджары па службовых пытаннях, не запытваюць асабістыя дадзеныя дыстанцыйна і не просяць здзяйсняць ніякія фінансавыя аперацыі.